Rusiya Ukraynaya kütləvi hücum etdi: ölənlər və yaralananlar var

Rusiya ordusunun Ukraynanın müxtəlif bölgələrinə raket və dronlarla hücumları nəticəsində ölən və yaralananlar var. Kiyevdə yaşayış binalarına və nəqliyyat infrastrukturuna ziyan dəyib, Xarkov, Donetsk və Çerniqov vilayətlərində də mülki əhali arasında itkilər qeydə alınıb.

"Associated Press"in məlumatına görə, Rusiyanın Kiyevə gecə saatlarında endirdiyi raket və dron zərbələri nəticəsində bir nəfər ölüb, 22 nəfər yaralanıb. Yaralananlar arasında uşağın da olduğu bildirilir. Hücum zamanı paytaxtın Dnepr çayının sol sahilində yerləşən ərazilərində yaşayış evlərinə və nəqliyyat infrastrukturuna ziyan dəyib.

"Kyiv Post"un məlumatına əsasən, Rusiyanın son 24 saat ərzində Donetsk, Xarkov və Çerniqov vilayətlərinə hücumları nəticəsində daha dörd mülki şəxs həlak olub, 14 nəfər yaralanıb. Ölənlər arasında Çerniqov vilayətində dron hücumu zamanı həlak olan 61 yaşlı kişi də var. Xarkov vilayətində isə qadının öldüyü, yaralananlar arasında 10 və 13 yaşlı uşaqların olduğu bildirilir.

Sonxeber.az Associated Press-ə istinadən xəbər verir ki, bundan başqa, Ukraynanın bir sıra şəhərlərində yaşayış evləri, avtomobillər və mülki obyektlər zərər görüb. Sumı şəhərində dronun avtomobilə düşməsi nəticəsində yanğın baş verdiyi, Kirovohrad vilayətində isə anbarların yerləşdiyi ərazidə yanğının qeydə alındığı bildirilir.

Hücumlar ABŞ-ın vasitəçiliyi ilə Rusiya və Ukrayna arasında danışıqların bərpası ehtimalının müzakirə edildiyi vaxt baş verib. Rusiya prezidenti Vladimir Putin ABŞ nümayəndəsi Stiv Uitkoffla görüşdən sonra üçtərəfli danışıqların yenidən başlanmasına prinsipial razılıq verib. Bununla belə, diplomatik təmasların bərpası müharibənin dayandırılması ilə bağlı yekun razılaşmanın əldə olunduğu demək deyil.

Müəllif: İlkin Məmmədkərimov

Telegramda izləyin