"Ancaq bir görüşlə bütün ziddiyyətlərin aradan qalxacağını düşünmək düzgün olmaz" - BƏHRUZ QULİYEV

"Tehranda keçiriləcək danışıqlar Yaxın Şərqdə gərginliyin azaldılması baxımından mühüm əhəmiyyət daşıyır. Əsas sual budur ki, bu görüş İranla Səudiyyə Ərəbistanı arasında münasibətlərin yaxşılaşmasına gətirib çıxara bilərmi?

Mən əvvəldən də qeyd etmişəm ki, bu münaqişənin genişmiqyaslı müharibəyə çevrilməsi qaçılmaz deyil. Çünki region ölkələrinin hər birinin öz maraqları var və müəyyən mərhələdə qarşılıqlı güzəştlərə getmək zərurəti yaranır." Bu fikirləri Səs qəzetinin baş redaktoru, siyasi ekspert Bəhruz Quliyev Sonxeber.az-a açıqlamasında deyib.
Ekspert qeyd edib ki, Türkiyə və Pakistanın bu prosesdə iştirakı da xüsusi əhəmiyyət daşıyır. Digər tərəfdən, Səudiyyə Ərəbistanının təhlükəsizliyi ilə bağlı öhdəliklər məsələyə əlavə siyasi həssaslıq gətirir. Lakin bu, Türkiyə və Pakistanın mütləq şəkildə Yəməndə hərbi əməliyyatlara qoşulacağı demək deyil. Burada əsas məqsəd hərbi qarşıdurmanı genişləndirmək yox, onun qarşısını almaq olmalıdır.

İran amili isə məsələnin ən həssas tərəflərindən biridir. Husilərlə bağlı gərginlik Tehranla Ər-Riyad arasındakı münasibətlərə birbaşa təsir göstərir. Əgər tərəflər qarşılıqlı təzyiq siyasətindən uzaqlaşaraq təhlükəsizlik məsələlərini diplomatik yolla həll etməyə çalışsalar, bu, münasibətlərin normallaşması üçün yeni imkanlar yarada bilər.

"Ancaq bir görüşlə bütün ziddiyyətlərin aradan qalxacağını düşünmək düzgün olmaz. Burada əsas məsələ konkret razılaşmaların əldə olunması və onların icrasıdır.

Hesab edirəm ki, bu danışıqların əhəmiyyəti müharibənin genişlənməsinin qarşısını almaq və regionda siyasi dialoqu gücləndirmək imkanındadır. Əgər tərəflər qarşılıqlı güzəştə getməyi bacarsalar, İran-Səudiyyə münasibətlərində də müsbət dəyişikliklərin əsası qoyula bilər. Əks halda, mövcud gərginlik yenidən qarşılıqlı təzyiq vasitəsinə çevrilə bilər." - deyə, B.Quliyev əlavə edib.

Müəllif: İlkin Məmmədkərimov

Telegramda izləyin