Zəfərin təməlində dayanan milli birlik və xalq həmrəyliyi

Azərbaycanın 44 günlük Vətən müharibəsində qazandığı tarixi Qələbənin əsas dayaqlarından biri xalqımızın nümayiş etdirdiyi misilsiz birlik və həmrəylik oldu. "Dəmir yumruq" ifadəsi yalnız hərbi gücün deyil, dövlətin, xalqın və ordunun vahid məqsəd ətrafında birləşməsinin rəmzinə çevrildi. Azərbaycan xalqı tarix boyu öz milli kimliyini, dövlətçilik ənənələrini və torpaqlarına bağlılığını qoruyub saxlamışdır. Ermənistanın Azərbaycana qarşı həyata keçirdiyi hərbi təcavüz nəticəsində torpaqlarımızın işğal edilməsi xalqımız üçün yalnız ərazi itkisi deyil, həm də böyük mənəvi və humanitar faciə idi. Bir milyondan çox insanın doğma yurdlarından didərgin düşməsi, şəhər və kəndlərimizin dağıdılması, tarixi-mədəni irsimizin məhv edilməsi cəmiyyətin bütün təbəqələrində dərin iz buraxmışdı. Bu illər ərzində Qarabağın azad edilməsi arzusu Azərbaycan cəmiyyətinin ortaq məqsədinə çevrildi. İnsanlar siyasi baxışlarından, sosial statuslarından, yaşadıqları bölgədən və fəaliyyət sahələrindən asılı olmayaraq torpaqlarımızın işğaldan azad olunmasını istəyirdilər. Prezident İlham Əliyevin rəhbərliyi ilə həyata keçirilən siyasət bu milli məqsədin reallaşdırılması üçün güclü dövlət və iqtisadi əsas yaratdı. Dövlət başçısının qətiyyətli mövqeyi, Azərbaycanın beynəlxalq nüfuzunun artması və ordumuzun güclənməsi cəmiyyətdə gələcək Qələbəyə inamı artırırdı.

Vətən müharibəsi ərəfəsində və müharibə dövründə Azərbaycan cəmiyyətində formalaşan siyasi həmrəylik xüsusilə diqqətəlayiq idi. Müxtəlif siyasi partiyalar və ictimai təşkilatlar ölkənin ərazi bütövlüyünün bərpası məsələsində ortaq mövqe nümayiş etdirirdilər. Siyasi partiyaların rəhbərləri tərəfindən qəbul edilən birgə bəyanatlar milli məsələlərdə siyasi fikir ayrılıqlarının arxa plana keçdiyini göstərirdi. Bu, Azərbaycan dövlətçiliyi baxımından mühüm hadisə idi. Çünki ölkənin müstəqilliyi, ərazi bütövlüyü və milli təhlükəsizliyi ilə bağlı məsələlərdə ümummilli maraqlar bütün digər siyasi mülahizələrdən üstün tutulurdu.

2020-ci il sentyabrın 27-də Vətən müharibəsi başlayanda xalqımızın nümayiş etdirdiyi birlik daha aydın şəkildə özünü göstərdi. Cəbhədən gələn xəbərlər bütün ölkədə böyük diqqətlə izlənilir, azad edilən hər bir yaşayış məntəqəsi ümumxalq sevincinə çevrilirdi. Müharibə günlərində minlərlə gənc könüllü olaraq orduya yazılmaq üçün müraciət etdi. Vətənin müdafiəsinə hazır olan insanlar öz bacarıqlarından və imkanlarından asılı olaraq ölkənin müdafiəsinə töhfə verməyə çalışırdılar. Bu mənzərə Azərbaycan cəmiyyətində vətənpərvərlik ruhunun nə qədər güclü olduğunu nümayiş etdirirdi. Cəbhə bölgəsində yaşayan sakinlərin davranışı da xalqımızın mənəvi gücünün göstəricisi idi. Ermənistanın yaşayış məntəqələrini ağır artilleriya və raket atəşinə tutmasına baxmayaraq, bir çox insanlar doğma evlərini tərk etməməyə çalışırdılar. Onlar hərbi qulluqçularımıza mənəvi dəstək göstərir, Vətən torpaqlarının müdafiəsində öz iradələrini nümayiş etdirirdilər. Arxa cəbhədə də böyük həmrəylik mühiti formalaşmışdı. İnsanlar hərbçilərə dəstək olmaq, ehtiyacı olan ailələrə yardım göstərmək və dövlətin həyata keçirdiyi tədbirlərə töhfə vermək üçün müxtəlif təşəbbüslərlə çıxış edirdilər.

Cəmiyyətin müxtəlif təbəqələri vahid məqsəd ətrafında birləşmişdi. Azərbaycanın müxtəlif bölgələrində yaşayan vətəndaşlarımız, o cümlədən müxtəlif etnik mənsubiyyətə malik insanlar Vətən müharibəsində ölkəmizin müdafiəsinə öz töhfələrini verdilər. Bu, Azərbaycanın çoxmillətli və multikultural cəmiyyət modelinin mühüm xüsusiyyətlərindən biridir. Ölkəmizdə yaşayan bütün xalqlar vahid dövlətçilik ideyası ətrafında birləşərək Azərbaycanın ərazi bütövlüyünün bərpasını ümumi milli məqsəd kimi qəbul etdilər. Xaricdə yaşayan azərbaycanlıların fəaliyyəti də bu həmrəyliyin mühüm tərkib hissəsi idi. Dünyanın müxtəlif ölkələrində yaşayan soydaşlarımız Azərbaycanın haqq səsini beynəlxalq ictimaiyyətə çatdırmaq, erməni lobbisinin dezinformasiya kampaniyalarına qarşı mübarizə aparmaq və ölkəmizə dəstək nümayiş etdirmək üçün fəal şəkildə bir araya gəldilər.

Müharibə dövründə beynəlxalq informasiya məkanında aparılan mübarizə xüsusi əhəmiyyət daşıyırdı. Ermənistanın müxtəlif dairələr tərəfindən dəstəklənən təbliğat kampaniyalarına qarşı Azərbaycan həqiqətlərinin çatdırılması zəruri idi. Prezident İlham Əliyevin beynəlxalq media qurumlarına verdiyi müsahibələr, Azərbaycanın rəsmi qurumlarının məlumatlandırma fəaliyyəti və xaricdəki diaspor təşkilatlarının təşəbbüsləri vahid informasiya mübarizəsinin mühüm hissəsinə çevrildi. Prezident İlham Əliyevin müharibə dövründə xalqa müraciətləri də milli ruhun yüksəlməsində mühüm rol oynadı. Dövlət başçısının qətiyyətli çıxışları, azad edilən ərazilərlə bağlı xəbərləri şəxsən elan etməsi və hərbçilərimizin qəhrəmanlığını yüksək qiymətləndirməsi xalqla dövlət arasında mənəvi bağlılığı daha da möhkəmləndirdi.

44 günlük müharibə zamanı Azərbaycan xalqı həm də böyük sınaqlardan keçdi. Ermənistanın Gəncə, Bərdə və digər yaşayış məntəqələrinə raket və artilleriya hücumları nəticəsində mülki şəxslər həlak oldu, evlər və mülki infrastruktur dağıldı. Bu hücumlar əhalidə qorxu yaratmaq məqsədi daşısa da, xalqımızın mübarizə əzmini sarsıda bilmədi. Azərbaycan vətəndaşları müharibənin ağır günlərində belə öz dövlətinə, ordusuna və Ali Baş Komandanına inamını qoruyub saxladı. Bu inam qələbəyə aparan yolun mühüm mənəvi dayaqlarından biri oldu.

Şuşanın azad edilməsi isə milli həmrəyliyin ən yüksək təzahürlərindən birinə çevrildi. Noyabrın 8-də bu xəbər bütün ölkədə böyük sevinc və qürurla qarşılandı. İnsanlar illərlə gözlədikləri tarixi anın gerçəkləşdiyini gördülər. Azərbaycanın Qələbəsi xalqımızın milli yaddaşında yeni bir mərhələnin başlanğıcı oldu. 2020-ci il dekabrın 10-da Bakıda keçirilən Zəfər paradı dövlətin, xalqın və ordunun birliyini nümayiş etdirən möhtəşəm hadisəyə çevrildi. Paradda Azərbaycan hərbçiləri ilə yanaşı, Türkiyə hərbçilərinin də iştirakı iki ölkə arasında mövcud olan qardaşlıq və müttəfiqlik münasibətlərinin təcəssümü idi. Müharibədən sonrakı dövrdə də milli həmrəyliyin qorunması xüsusi əhəmiyyət daşıyır. Çünki tarixi Qələbənin nəticələrinin möhkəmləndirilməsi, azad edilmiş ərazilərin bərpası və Böyük Qayıdış prosesinin uğurla həyata keçirilməsi yalnız dövlətin deyil, bütün cəmiyyətin ümumi məsuliyyətidir.

Şəhid ailələrinə və qazilərə göstərilən qayğı bu məsuliyyətin mühüm hissəsidir. Vətən uğrunda canından keçən insanların ailələrinin sosial müdafiəsi, müharibə iştirakçılarının məşğulluğunun təmin edilməsi, mənzil və reabilitasiya proqramlarının həyata keçirilməsi dövlətin əsas prioritetlərindəndir. "YAŞAT" Fondunun fəaliyyəti də bu sahədə dövlət və cəmiyyət əməkdaşlığının mühüm nümunəsidir. Fond şəhid ailələrinin və müharibə nəticəsində əlilliyi müəyyən edilmiş şəxslərin problemlərinin həllinə əlavə dəstək göstərərək vətəndaş həmrəyliyinin real nəticələrini ortaya qoyur.

Zəfərdən sonra milli birlik anlayışı yeni məzmun qazanmışdır. Əgər müharibə dövründə bu birlik torpaqların azad edilməsi məqsədi ətrafında formalaşmışdısa, hazırda əsas vəzifə əldə edilmiş tarixi nailiyyətlərin qorunması, dövlətçiliyin möhkəmləndirilməsi və ölkənin davamlı inkişafının təmin edilməsidir. Azərbaycan cəmiyyətinin qarşısında duran əsas vəzifələrdən biri bu milli ruhun gələcək nəsillərə ötürülməsidir. Gənclərimiz Vətən müharibəsinin qəhrəmanlıq salnaməsini öyrənməli, şəhidlərimizin həyat yolunu tanımalı, qazilərimizin fədakarlığını bilməli və dövlətimizin müstəqilliyinin hansı çətinliklər bahasına əldə edildiyini dərk etməlidirlər. 8 Noyabr - Zəfər Günü bu baxımdan həm də milli yaddaş və vətənpərvərlik günüdür. Bu tarix xalqımızın birlikdə olduqda qarşısına qoyduğu ən çətin məqsədlərə belə nail ola biləcəyini sübut etdi. "Dəmir yumruq" Azərbaycanın gücünü, qətiyyətini və milli həmrəyliyini ifadə edən tarixi rəmzə çevrildi. Bu rəmzin arxasında milyonlarla insanın ortaq arzusu, hərbçilərimizin qəhrəmanlığı, şəhidlərimizin fədakarlığı və dövlətimizin siyasi iradəsi dayanır. Bu gün də həmin birlik Azərbaycanın gələcək inkişafının ən mühüm dayaqlarından biridir. Çünki Zəfəri qazanmaq qədər onu qorumaq, möhkəmləndirmək və gələcək nəsillərə ötürmək də böyük məsuliyyətdir.

Şahin Seyidzadə
Milli Məclisin deputatı

Telegramda izləyin