Avropada hibrid müharibə təhlükəsi artır: Kiberhücumlar və bomba təhdidləri nəqliyyatda xaos yaradıb

Avropada son günlər hava limanlarına bomba təhdidləri, supermarketlərin soyuducu sistemlərinə kiberhücumlar və digər təhlükəsizlik insidentləri qeydə alınıb. Baş verən hadisələr Avropa ölkələrində hibrid müharibə təhlükəsi ilə bağlı narahatlıqları artırıb.

Sonxeber.az The Guardian-a istinadən xəbər verir ki, son günlər Avropanın müxtəlif ölkələrində baş verən hadisələr təhlükəsizlik qurumlarının diqqətini cəlb edib. Hava limanlarına ünvanlanan saxta bomba xəbərdarlıqları nəticəsində azı 25 aviareysdə gecikmələr və istiqamət dəyişiklikləri qeydə alınıb.

Nəşrin məlumatına görə, noyabrın 5-də İtaliya, İrlandiya, Böyük Britaniya, İspaniya, Bolqarıstan, Rumıniya, Polşa, Finlandiya, Avstriya, Danimarka, Belçika, Portuqaliya, Yunanıstan və Çexiya ilə əlaqəli uçuşlar təhdidlərdən təsirlənib. Bir neçə təyyarə təcili eniş edib, digərləri isə alternativ hava limanlarına yönləndirilib. Aparılan ilkin yoxlamalarda partlayıcı qurğu aşkar edilməyib.

Bundan əvvəl isə Avropanın yeddi ölkəsində supermarketlərin soyuducu və dondurucu sistemlərinə kiberhücumlar qeydə alınıb. Hücumlar nəticəsində bəzi mağazalarda soyuducu qurğuların temperaturu 50 dərəcəyədək yüksəlib, çoxlu sayda ərzaq məhsulu yararsız hala düşüb.

Məqalədə Fransada da oxşar hadisənin baş verdiyi xatırladılır. Ötən ay ölkədə yüzlərlə supermarketin soyuducu sistemlərinin haker hücumuna məruz qaldığı, nəticədə milyonlarla avro dəyərində ərzaq məhsulunun məhv olduğu bildirilir.

Nəşr vurğulayır ki, bu hadisələrin arxasında konkret hansı qüvvələrin dayandığı hələ müəyyən edilməyib. Təhlükəsizlik və kibertəhlükəsizlik üzrə mütəxəssislər isə bu cür insidentlərin dövlət səviyyəsində həyata keçirilən hibrid əməliyyatların tərkib hissəsi ola biləcəyini istisna etmirlər.

Kremlin sözçüsü Dmitri Peskov Rusiyanın bu hücumlarla əlaqələndirilməsini əsassız adlandırıb.

Məqalədə qeyd olunur ki, Avropanın kritik infrastrukturlarının, xüsusilə nəqliyyat, ərzaq təchizatı və rəqəmsal idarəetmə sistemlərinin kibertəhlükəsizliyinin gücləndirilməsi getdikcə daha vacib məsələyə çevrilir.

Müəllif: İlkin Məmmədkərimov

Telegramda izləyin