"Düşmən mediasındakı yalan məlumatlar hərbçilərimizin ruhuna mənfi təsir edə bilər"

"Daxili hərbi-siyasi vəziyyəti iyul döyüşlərinə nəzərən təhlil etdikdə görürük ki, bu döyüşlərdə Azərbaycanın media sektoru da özünü müsbət mənada göstərdi. Müdafiə Nazirliyinin mətbuat xidməti lazımi tədbirlər görərək, həm iaşə obyektlərində, həm ictimai nəqliyyatda, həm də kütləvi informasiya vasitələrində geniş təbliğat işləri apardı".

"MediaPost"un məlumatına görə, bunu politoloq, Sosial Tədqiqatlar Mərkəzinin daxili siyasətin təhlili departamentinin baş məsləhətçisi İlyas Hüseynov deyib.

"Bəzən bir foto bütün prosesi dəyişə bilər"

Onun fikrincə, iyul hadisələrində hərbçilərimizin dislokasiyası, hərbi texnikaların, silah-sursatların və ağır artilleriyanın istiqamətinin yerdəyişməsi dövlət sirrinin yayılmaması fonunda həyata keçirilib:

"Bu hadisələrdə qabaqlayıcı tədbirlər həm mediada, həm də sosial şəbəkələrdə aparıldı. İnformasiya müharibəsində düşmən tərəfinin ayıq-sayıq olması hər birimizi daha diqqətli davranmağa səfərbər etdi. Təsəvvür edin, bəzən bir foto bütün prosesi dəyişə bilər. Ona görə media nümayəndələri, sosial şəbəkə istifadəçiləri və blogerlər özlərini ümumi milli kontekstdə göstərə bildilər. Təkcə ənənəvi media yox, eləcə də böyük auditoriyanı idarə edən blogerlər var. Səhvlər arzuolunan deyil. İyul döyüşləri digər döyüşlərdən bu sahədə irəliləyişlərin olması ilə fərqləndi. Deyə bilərik ki, dövlətin informasiya siyasəti uğurlu oldu".

İ. Hüseynov müşahidələrinə əsasən bildirib ki, əvvəllər sosial şəbəkə istifadəçiləri bilməyərəkdən səhvə yol verirdilərsə, hazırda təbliğat işlərinin aparılmasına görə, bu məsələlərdə xeyli dəyişiklik olub:

"Hazırda ictimaiyyətdə sosial məsuliyyət yüksək səviyyədədir. Hər kəs özünü informasiya müharibəsinin "döyüşçü"sü hesab edir. Onlar yalnız rəsmi qurumların verdiyi məlumatları paylaşaraq, yalan məlumatların yayılmasının qarşısını alırlar. Bilirlər ki, səhv və təhrif olunmuş məlumat yaymaq faciə ilə nəticələnə bilər. Unutmaq olmaz ki, düşmən mediasında yayılan hər bir yalan məlumat hərbçilərimizin də döyüş ruhuna mənfi təsir edə bilər".

Telegramda izləyin