Əfqanıstanda nələr baş verir? - Əmrullah Saleh şayiələri TƏKZİB ETDİ

Əfqanıstanın keçmiş vitse-prezidenti və Milli Müqavimət Cəbhəsinin liderlərindən olan Əmrullah Saleh, Pəncşir əyaləti və Əfqanıstanı tərk etdiyi barədə iddiaların yalan və düşmən təbliğatı olduğunu deyib.

"Taliban" qüvvələrinin Pəncşir əyalətini ələ keçirdikləri barədə iddiaları ilə bağlı "Euronews"a danışan Saleh üsyançı komandirlər ilə görüş keçirdiklərini və vəziyyəti siyasi fiqurlarla idarə etdiklərini bildirib.

Sovet İttifaqına qarşı müqavimətin simvollarından olan Əhməd Şah Məsudun oğlu Əhməd Məsudla birlikdə "Taliban" əleyhinə müqavimətini davam etdirən Saleh vəziyyətin çətin olduğunu, ancaq əyalətin nəzarətini hələ də əllərində saxladıqlarını vurğulayıb:

"Pakistanlıların dəstəyi ilə "Talban", "Əl-Qaidə" və digər kiçikçaplı terrorçu qruplar tərəfindən hücuma məruz qalmışıq. Torpaqlarımızı müdafiə edirik və müqavimətimiz davam edir. Düşmənlə yanaşı biz də itkilər verdik. Düşmənin bir neçə cəbhədən hücuma keçməsinə baxmayaraq, vəziyyəti nəzarətə götürə bildik"

Qeyd edək ki, avqustun 15-də paytaxt Kabilə girən və ölkənin idarəsini ələ keçirən "Taliban" silahlıları Sovet İttifaqının da daxil ola bilmədiyi Pəncşir əyalətini nəzarətə ala bilmədilər. Buna baxmayaraq, "Taliban" mənbələri Pəncşir əyalətinin cümə günü, axşam ələ keçirildiyi xəbərini yayıb və bununla əlaqədar Kabildə silah səsləriylə "şənlik" keçirilib.

Rafi Müslümov

Telegramda izləyin