"Həftəsonu avtobus və metronun işləməməsi absurd məsələdir" - AÇIQLAMA

Artıq bir ildən çoxdur ki, həftəsonu ictimai nəqliyyat işləmir. Bildiyimiz kimi, insanların əksəriyyəti yalnız 5 gün deyil, şənbə və bazar günləri də işləyirlər. Taksi xidmətindən istifadə etmək isə hər kəsin cibinə uyğun deyil. Bu məsələ insanların haqlı narazılığına səbəb olur.

Mövzu ilə bağlı Sonxeber.az-a açıqlama verən deputat Razi Nurullayev bildirib ki, bu qadağalar aradan qaldırılmalı və ictimai nəqliyyat həftəsonu işləməlidir:

"İlk növbədə deməliyəm ki, yay ayı ərzində həftəsonu ictimai nəqliyyatın işləməməsi ciddi problem yaratsa da, sarsıdıcı şəkildə ziyan vurmayıb. Bu gündən məktəblər açılıb, universitetlər də açılacaq. Rayonlardan tələbələr artıq Bakıya gəlməyə başlayıblar.

Bir həftədir ki, şəhərin küçələrində nəqliyyatın hərəkəti iflic vəziyyətdədir. Belə hal bu ayın sonunda və oktyabrın əvvəlində daha fəlakətli şəkil alacaq.

Hər zaman demişəm, indi də deyirəm: ümumiyyətlə şənbə və bazar günü ictimai nəqliyyatın işləməsinə qadağanın qoyulması Azərbaycanda pandemik vəziyyətin aşağı düşməsinə səbəb olmur və bu, absurd məsələdir.

İmkanı yaxşı olan insan evdən çıxır, haradasa toplaşır, istədiyi yerə gedir. Qadağanın ziyanını kasıblar çəkir, çünki onlar taksi ilə getməli olurlar. Bu isə ailə büdcəsinə böyük zərbədir. Bütün əhaliyə kritik xidmət göstərəcək sahələrin də "beli qırılır". Ona görə də, Operativ Qərargah həftəsonu qadağasının qaldırılması ilə bağlı təcili qərar verməlidir".

ZAİRA AKİFQIZI

Telegramda izləyin