"Məcburiyyətlə əldə olunan nəticə nevroza səbəb ola bilər" - Psixoloq

İstiqamət: Uşaq və gənclərin fiziki və mənəvi inkişafı

Uşaq və gənclərin fiziki və mənəvi inkişafı ölkəsinin, yaşadığı cəmiyyətin, xalqının inkişaf göstəricisi, dövlətin gələcəyidir. Onların düzgün formalaşması, fiziki və mənəvi inkişafı naminə yeni nəsli idmana həvəsləndirmək, idmanı onların həyatının ayrılmaz hissəsinə çevirmək üçün nə etmək olar? Bundan əlavə, mənəvi inkişafla bağlı onlara milli-mənəvi dəyərləri, kökümüzə bağlılığı, vətənpərvərlik ruhunu aşılamaq üçün hansı işlər görülməlidir?

Sonxeber.az mövzu ilə bağlı psixoloq Aygün Cəfərovadan münasibət öyrənib.

O bildirir ki, insan fərd olaraq doğulur, şəxsiyyət olaraq formalaşır:

"Bu formalaşmada 25% genetikanın, 25% ailənin, 25% isə ətraf mühitin, universitetin, məktəbin təsiri var. Yerdə qalan 25% isə artıq müəyyən yaş həddinə çatandan sonra insanın öz üzərində işlədiyi mənfi, müsbət xüsusiyyətlərin dəyərləndirilməsi, müəyyən vərdişlərin əlavə olunmasından asılıdır.

İnsanın fiziki və mənəvi inkişafında onun psixikasının rolu çox önəmlidir. Yəni bir uşağın, gəncin, yeniyetmənin həm fizioloji, həm mənəvi cəhətdən düzgün inkişaf etməsi üçün ilk olaraq onun emosiyalarına önəm verilməlidir, uşaq ailə tərəfindən sevgi ilə təmin olunmalı, ona bir şəxsiyyət kimi yanaşılmalı, böyük insan kimi hörmət olunmalıdır. Uşaq olmağına baxmayaraq, ona bir böyük kimi münasibət göstərilsə, həm fiziki, həm də mənəvi cəhətdən düzgün bir şəxsiyyət yetişmiş olar.

Ümumiyyətlə, uşaqların idmana həvəsləndirilməsində də ailənin rolu böyükdür. Həmişə buna çox rast gəlirəm ki, valideynlər uşaqlarına "kitab oxu", "idmanla məşğul ol" kimi tövsiyələr edirlər, lakin özləri həmin tövsiyələrə əməl etmirlər. Halbuki ən gözəl tərbiyə üsulu əməli üsuldur. Məcburiyyətlə idmana göndərmək, kitab oxutdurmaq, hər hansı bir vərdişi aşılamaq faydasız olar. Çünki məcburiyyətlə əldə olunan nəticə bir müddət sonra insanlarda nevroza səbəb ola bilər.

Uşaq və gənclərimizə ilk öncə ailə dəyərləri aşılanmalıdır. Bununla paralel olaraq, vətənpərvərlik ruhu, milli-mənəvi dəyərlərimiz, kökümüzə bağlılıq aşılanmalı, ailədə qəhrəmanlarımız haqqında söhbətlər aparılmalıdır. Eyni zamanda, valideynlər də milli-mənəvi dəyərləri yüksək tuturlarsa, həmin ailədə formalaşan uşaqlarda mənəvi duyğular yüksək olur".

Material Azərbaycan Respublikası

dəstəyi ilə hazırlanmışdır.

Aysel Səfərzadə

Telegramda izləyin