"Şəhid olduğu yeri qucaqlayıb öpmək istəyirəm" - Milli Qəhrəmanın atası

Vətən Müharibəsinin Anım Günü münasibətilə şəhidlərin ziyarəti davam edir. Vətəndaşlar eyni zamanda İkinci Fəxri xiyabanda polkovnik Şükür Həmidovun, general-mayor Polad Həşimovun, polkovnik İlqar Mirzəyevin və digər şəhidlərin məzarlarını ziyarət ediblər.

Milli Qəhrəman Şükür Həmidovun atası Nəriman Həmidov və ailə üzvləri də ziyarətə qoşulublar. N.Həmidov "Qafqazinfo"ya açıqlamasında bildirib ki, qələbə bizə hava və su kimi lazım idi: "Qələbə də qurbansız olmaz. Belə bir ifadə var:

Geyib əsgər paltarını, silahlandı qəhrəman,

Onun polad sinəsinə sığışmadı ürəyi.

Həqiqətən də, bizim Prezidentimiz əsgər forması geyindi, geniş ürəyinə, polad sinəsinə sığmadı onun ürəyi. Məğlub xalq adı onun rəhbərliyi altında üzərimizdən götürüldü, xalqının önünə düşərək, cəsarətlə bizə qalib xalq adını verdi. Mən buradan möhtərəm Prezidentimizə bütün xalqımız adından öz salamımı çatdırıram, arzu edirəm ki, elə bu sürətlə də, bu cəsarətlə də addımlasın. Xalqımıza arzu edirəm ki, bu birliyi, həmrəyliyi qorusun. Əgər bu birlik olmasa idi, biz qalib ola bilməzdik. Bütün xalqımıza xoşbəxtlik, firavanlıq, daim qalibiyyət arzulayıram".
N.Həmidov qeyd edib ki, oğlu Şükür çox vətənpərvər olub: "Bəzən olurdu ki, çay içdiyi yerdə deyirdi ki, "ay ata, biz burada pürrəngi çay içirik, torpaqlarımız düşmən tapdağı altındadır". Mən də həmişə deyirdim ki, "oğul, hər şeyin bir vaxtı var, narahat olma". Heç vaxt düşünməzdim ki, belə bir hadisə yaxın vaxtda baş verəcək.

Müharibə vaxtı tez-tez danışırdıq, özü də çox zarafatcıl adam idi. Bir az zarafat edirdi ki, narahat olmayaq. Axırıncı dəfə oktyabrın 19-da zəng etdi, dedi ki, "ata bəlkə getdik siz tərəfə", Qubadlını nəzərdə tuturdu. Dedim, oğul, dizlərini qoy yerə, bizim kənddə bir bulaq var, Nağıl bulağı, oradan doyunca su iç, dedi ki, "ata, hələ tezdir". Getdi, Qubadlını qucaqladı, amma sudan içə bilmədi. Şükürün şəhid olduğu yeri ziyarət etmək, qucaqlamaq, öpmək istəyirəm.

Çox şükürlər olsun ki, torpağımızı azad edə bildik. Möhtərəm Prezidentimizin dəmir yumruğu altında torpaqlarımızı işğaldan azad etdik. Şəhidlərimizə rəhmət, yaralılarımıza şəfa diləyirəm. Mehriban xanıma buradan təşəkkürlərimi çatdırıram, yaralılarımıza yardımlar edir.

Allah bu günü xalqımıza çox görməsin. Azad, firəvan yaşamaq üçün çalışaq".

Fotoda: Milli Qəhrəman Şükür Həmidov

Telegramda izləyin