Nəqliyyatdakı sıxlıq kimlərə sərf edir? - İşbazlar iş başında

Xəbər verdiyimiz kimi, ali və orta məktəblərdə tədris əyani şəkildə davam edir. Buna görə də, metro və avtobuslarda sıxlıq yaranıb. Bunu necə aradan qaldırmaq olar?

Məsələ ilə bağlı Sonxeber.az-a açıqlama verən ekspert Elməddin Muradlı bildirib ki, Bakıda nəqliyyat sistemi düzgün işləmir:

"Çəkilən yol şəbəkəsi, yol infrastrukturu Bakıda o dərəcədə yüksək səviyyədə deyil ki, biz bu probləmləri kökündən həll edək. Paytaxtda ictimai nəqliyyatın nə yerüstü, nə də yeraltı növləri normal şəkildə işləmir.

Metro stansiyalarının sayı kifayət qədər deyil, metro bütün Bakını əhatə etmir. Bayıl, Masazır istiqamətində metro stansiyası yoxdur. Bakının mərkəzində məhəllələr söküldü. Əvvəllər 5-10 ailənin yaşadığı o məhəllələrdə indi 200-300 nəfərlik mənzlillər tikilib. Bütün bunlara görə də, yaxın zamanda şəhərdə ümumiyyətlə nəfəs almaq olmayacaq.

Şəhərdə məskunlaşma qaydalara uyğun aparılmır və bu bizim hamımızın ziyanınadır. Bu, yalnız bəzi işbazların və məmurların xeyrinədir. Metroları şaxələndirmək mümkün deyil, çünki həmin ərazilərdə binaların tikildiyi deyilir. Bəs bu binaların tikilməsinə kim icazə verib? Heç kim!
Sıxlığı aradan qaldırmaq üçün böyük şirkətləri, bəzi nazirlikləri kənarlara çıxarmaq lazımdır. Dövlət Sərhəd Xidmətinin, Müdafiə Nazirliyinin, Kənd Təsərrüfatı Nazirliyinin və digər qurumların Bakıda olmağı düzgün deyil.

Bakının baş planı qəbul olunub, amma hələ də o plana uyğun iş görülmür. Baş planda nəqliyyatla bağlı bəzi layihələrin həyata keçirilməsi nəzərdə tutulur. Ümidimiz onadır ki, bu planlar həyata keçirildikdən sonra nəqliyyat şəbəkəsi normallaşa bilər.

Məktəblərlə bağlı da problem ondan ibarətdir ki, uşaqları məktəbə aparmaq üçün vahid avtobus yoxdur. Əgər vahid servis olsa, məktəb ətrafında avtomobillər yığılmaz və sıxlıq yaranmaz".

Aytəkin CƏLALİ

Telegramda izləyin