"Hər addımda Azərbaycan əleyhinə siyasət aparan bu ölkənin riyakarlığı sərhəd tanımır" - Deputat

İkinci Qarabağ müharibəsi zamanı Azərbaycan ordusuna dəstək və İranın Ermənistana yardımlarına etiraz məqsədilə Ərdəbil şəhərinin Cinral parkında aksiya keçirən 12 ərdəbilli fəall barəsində qərar çıxarılıb. Oktyabrın 9-da Ərdəbilin Cəza Məhkəməsinin 102-ci bölməsinin başçısı Tahir Rəsulinin çıxardığı qərara görə, fəallar ümumilikdə 180 ay həbs, 888 qamçı cəzasına məhkum ediliblər.

Bununla bağlı Sonxeber.az-a danışan deputat Nəsib Məhəməliyev İranda 44 günlük müharibədə Ermənistana göstərilən dəstəyə görə etiraz mitinqlərində fəallığı ilə seçilən gəncin edam olunması xəbərinə sosial şəbəkələrdə rast gəldiyini bildirib:

"Olduqca acı, təəssüfləndirici xəbərdir. 21-ci yüzillikdə orta əsrlərin feodal təfəkkürü ilə, əks fikir səsləndirdiyinə görə insanın ölüm cəzasına məhkum olunması molla rejiminin əsl simasının sübutudur. Acınacaqlı haldır ki, belə bir anti-insani siyasət cənub qonşumuz tərəfindən İslam dini və şəriətlə əlaqələndirilir. Halbuki İslam dininin mahiyyəti xeyirxahlıq, başqasının haqqına girməməkdən ibarətdir. Onun təməl prinsiplərindən biri kiminsə həyatına son vermək hüququnun heç kimə verilməməsi ilə bağlıdır. Məhz insan haqlarının son dərəcə kritik olduğu, milyonlarla soydaşlarımızın ana dilində təhsil almaq imkanı olmayan ölkə dünya birliyi tərəfindən təcrid vəziyyətində yaşayır.

Ermənistandan başqa, bütün qonşuları, dünyanın əksər ölkələri ilə münasibətləri düşmənçilik səviyyəsindədir. Üzdə özünü dost-qardaş kimi qələmə verən, hər addımda Azərbaycan əleyhinə siyasət aparan bu ölkənin riyakarlığı sərhəd tanımır. Məhz İranın qonşu ölkələrin, konkret olaraq Livan, İraq, Suriya və digər dövlətlərin daxili işlərinə qarışması, həmin ölkələrdə silahlı terror təşkilatları yaratması, milyonlarla insanın faciəsinə səbəb olub. Çox təəssüf ki, müstəqillik illərində bizdə də həmin şəbəkənin fəaliyyətləri nəticəsində kifayət qədər gənclər təsir altına düşüblər. Hesab edirəm ki, belə təbəqələr arasında ciddi maarifləndirmə işləri aparılmalıdır".

Aysel Yusifqızı

Telegramda izləyin