"Sülhməramlılar təxribatı törədənləri Azərbaycana verməlidirlər, əks təqdirdə..."

Qanunsuz erməni dəstələrinin törətdiyi təxribat nəticəsində əsgər Həmzəyev Əfqan Bəhram oğlunun şəhid olması xəbəri hər birimizi üzdü. Baş verən təxribatdan belə bir nəticəyə gəlmək olar ki, hələ də Ermənistanda revanşist fikirlərlə yaşayan, təxribat törətməyə meyilli olan, Azərbaycan-Ermənistan münasibətlərinin yaxşılaşmasını istəməyən və münaqişənin alovlanmasına çalışan qüvvələr var.

Bu sözləri Sonxeber.az-a açıqlama verən millət vəkili Naqif Həmzəyev bildirib.

O, təxribatı törədənlərin Azərbaycana təhvil verilməli olduğunu vurğulayıb:
"Bu qüvvələr də hazırkı Ermənistan hakimiyyətinə tabe olmaq istəmirlər. Bəzi qruplar erməni havadarlarının dəstəyi ilə belə təxribatlara meyillənirlər və göründüyü kimi, bəzən təxribatları baş tutur.

Biz anlamalıylq ki, Azərbaycan Respublikasının Xarici İşlər Naziri və Ermənistan Xarici İşlər Nazirinin Rusiya vasitəçiliyi ilə görüşü ərəfəsində belə bir təxribatın törədilməsinin birbaşa hədəfi və məqsədi münasibətlərin yaxşılaşmasına zərər vurmaq, əldə ediləcək sülh danışıqlarını pozmaq və münaqişəni alovlandırmaqdır.

Biz rus sülhməramlılarından bu təxribatı törədən şəxslərin tapılmasını və Azərbaycana təhvil verilməsini tələb etməliyik. Əks təqdirdə, Azərbaycan tərəfi bu təxribatçıların tapılması və cəzalandırılmasını özü həyata keçirəcək.
Həmçinin bu və buna bənzər təxribatların bir daha təkrarlanmaması üçün qanunsuz erməni silahlı dəstələri zərərsizləşdirilməli və onların fəaliyyətinin qarşısı alınmalıdır".

Aytəkin CƏLALİ

Telegramda izləyin