"Bu gün ən vacib məsələlərdən biri həmrəyliyimizi qorumaq və gücləndirməkdir" - Deputat

Qardaş ölkə Türkiyədə bu gün 29 oktyabr Cümhuriyyət bayramıdır. Artıq Zəfər Günündən 98 il ötür. Türkiyə Respublikasının qurucusu Mustafa Kamal Atatürk Qurtuluş savaşında Qərb ölkələri üzərində qələbədən sonra 29 oktyabr 1923-cü il tarixində Türkiyədə respublika qurulduğunu elan edib.

Məsələ ilə bağlı Sonxeber.az-a deputat Ceyhun Məmmədov fikir bildirib.

O, Azərbaycanın Qarabağda zəfər əldə etməsində Türkiyənin Azərbaycana mənəvi və siyasi dəstəyinin xüsusi rol oynadığını qeyd edib:

"Bəli, qeyd etdiyiniz kimi, bu gün qardaş Türkiyə bayram içərisindədir, möhtəşəm Zəfər Gününü qeyd edir. Məncə, bizim dostluğumuzu ən gözəl ifadə edən fikirlərdən biri Ulu Öndərin "bir millət, iki dövlət" tərifidir. Biz ayrı-ayrı dövlətlər olsaq da, bir millətik, bir millətin qurduğu dövlətik.

Bu gün Azərbaycan-Türkiyə münasibətləri artan xətlə yüksək səviyyədə inkişaf edir. Xüsusi qeyd etmək lazımdır ki, münasibətlərimizin bu səviyyədə olmasında da həm cənab Prezident İlham Əliyevin, həm də möhtərəm Türkiyə Prezidentinin müstəsna xidmətləri və rolu var.

Bu əlaqələr son illər daha da inkişaf edib. Azərbaycanın Qarabağda zəfər əldə etməsində Türkiyənin Azərbaycana mənəvi və siyasi dəstəyi xüsusi rol oynayır. Bu gün qarşıda duran ən vacib məsələlərdən biri də həmrəyliyimizi, birliyimizi qorumaq, gücləndirməkdir.
Hazırda Azərbaycan xalqı da Türkiyə xalqı qədər sevinir və bu bayramı qeyd edir. Bizim insanlar, mətbuatımız, həmçinin siyasi liderlərimiz təbriklər ünvanlayırlar. Cənab Prezidentimiz Türkiyə Prezidentinə təbrik ünvanladı, Milli Məclis sədri də təbrik etdi. Bunlar bizim, iki xalq olaraq, həmrəyliyimizin nümunəsidir. Bu birlik və bərabərlik sarsılmazdır, bundan sonra daha da inkişaf edəcək və güclənəcək".

ZAİRA AKİFQIZI

Telegramda izləyin