Düşmənin dilini bilən, onlara kabus yaşadan ŞƏHİDİMİZİ TANIYAQ - FOTO

Bu gün işğal altında olan torpaqlarımızın azadlığı uğrunda canından keçən Elvin Rəhimovun şəhadətə ucalmağından bir il ötür.

Sonxeber.az xəbər verir ki, bu müharibədə bizə öz canı bahasına qələbə bəxş edən şəhid Rəhimov Elvin Ehtiram oğlu 20 noyabr 1991-ci ildə Füzuli rayonu Zərgər kəndində anadan olmub.

Elvin 2007- ci ildə Cəmşid Naxçıvanski adına hərbi liseyə qəbul olub. 2010-cu ildə həmin liseyi əla qiymətlərlə bitirərək, Ali Hərbi Məktəbə qəbul olur. 2014- cü ildə eyni məktəbin kəşfiyyatçı ixtisasını bitirir. 2015-ci ildə ona Naxçıvan MR təyinatı verilir.

Elvin 3 xarici dil (ingilis, rus, erməni) bilib, 3 fərqli idman növü (karate, aykido, qaydasız döyüş) ilə məşğul olub. O, hətta karate üzrə çempion olub.

Şəhidimiz qulluq etdiyi hərbi hissədə, kəşfiyyatçı qrupun komandiri, komandirin siyasi məsələlər üzrə müavini ("zampalit"), bölük komandiri və ordu hissəsində rəis vəzifəsində çalışıb. Savadı sayəsində çalışdığı yerdə daim fərqlənib. Xidməti dövründə bir neçə dəfə fəxri fərmanla təltif olunub.

Naxcıvan MR sədri tərəfindən xidmətində fərqləndiyinə görə mükafatlandırılıb. Azərbaycan ordusunun yaranması münasibəti ilə yubiley medalı ilə təltif olub.

Bacısının sözlərinə görə, Elvinin ən böyük arzusu torpaqlarımızın işğaldan azad olması olub:

"Tale elə gətirdi ki, bu arzusu həyata keçdi. 27 sentyabr 2020-ci il tarixində Azərbaycan ordusu işğalda olan torpaqları azad etmək üçün əks-hücuma başladı. Bu zaman qardaşım da qürur hissi ilə döyüşüb.

Elvin Cəbrayıl, Füzuli, Qubadlı, Zəngilan, Xocavənd və Şuşanın azadlığı uğrunda qəhrəmancasına vuruşub. Düşmənin "Kabus" adlandırdığı dəstəyə başçılıq edib. Tabeliyində olan əsgərlərlə birlikdə düşmənin yüzlərlə texnikasını, xeyli sayda canlı qüvvəsini məhv edib.

Ən yadda qalan isə Şuşa döyüşləri olub. Şuşada bizim əsgər və zabitlərimiz qəhrəmanlıq dastanı yazdı. Elvin arzusuna çatdı. Torpaqlarımız işğaldan azad olundu. Amma o, bunun səfasını çəkə bilmədi.

Elvin 4 noyabr 2020-ci il tarixində şəhidlik zirvəsinə ucaldı".

ZAİRA AKİFQIZI

Telegramda izləyin