Vaksinsiz, virussuz həyata nə zaman qayıdacağıq? - AÇIQLAMA

Artıq iki ilə yaxındır ki, "COVID-19" bəlası bitmək bilmir. Bu səbəbdən insanlar vaksinasiya olunurlar. İlk öncə 2 dozanın kifayət olduğu deyilsə də, bəzi alimlər hər il vaksin vurdurmaq lazım olduğunu qeyd edirlər. Bəs biz normal, vaksinsiz həyata nə zaman dönəcəyik?

Məsələ ilə bağlı Sonxeber.az-a infeksionist Nicat Əzimli açıqlama verib.

O vurğulayıb ki, hər bir vətəndaş ilk növbədə öz sağlamlığı üçün, daha sonra isə ətrafındakı insanları qorumaq niyyəti ilə vurdurur:

"Biz həkimlər isə hazırkı zamanda sağlamlıq üçün ən optimal olan nədirsə, o istiqamətdə məsləhətlərimizi veririk. Pandemiyanın əvvəlində istehsal olunan vaksinlər koronavirusun Vuhan variantının əsasında hazırlanmışdı. Bu variantın törətdiyi xəstəliyi önləməkdə vaksinlər çox effektivdir. Daha sonra genotip müxtəlif mutasiyalara məruz qaldı və yeni variantlar ortaya çıxdı. Bu variantlarda isə vaksinin yaratdığı süni immunitetə qarşı müəyyən dərəcədə rezistentlik mövcuddur.

Yəni vaksinlər, xüsusilə Azərbaycanda ən geniş tətbiq olunan "Coronavac" ("Sinovac") vaksini bu yeni variantlara qarşı əvvəlki qədər effektiv deyil. "Coronavac"la vaksin olunmuş şəxslər əvvəllər 6 aya qədər xəstəliyə yoluxmurdusa, yoluxsa belə, ağırlaşmırdılarsa, indi bu müddət qısalıb. Buna qarşı tədbir olaraq, vaksinlərin yeni variantlara uyğun istehsalına keçilir.

Burada əlçatanlığın operativ şəkildə təmin olunması problemi ortaya çıxa bilir. Buna görə də vəziyyətdən ikinci çıxış yolu olaraq "Sinovac" vaksininin sonuncu dozasından sonra 3 ayı tamam olan şəxslərə, "Pfizer"də isə 5-ci aydan sonra buster doza məsləhət görülür".

İnfeksionistin sözlərindən belə başa düşülür ki, bəzi alimlərin bildirdiyi kimi, koronavirus bitməsə, özümüzü qorumaq üçün ömrümüzün sonunadək vaksin vurdurmalı olacağıq.

ZAİRA AKİFQIZI

Telegramda izləyin