Bakıda 15 yaşlı qızla qeyri-rəsmi yaşayan şəxs saxlanılıb - AÇIQLAMA

Xəbər verdiyimiz kimi, fevralın 4-də, Bakının Xəzər rayonu, Binə qəsəbəsi sakini 06 may 2006-cı il təvəllüdlü Nigar Rüstəmova (ad və soyad şərtidir) və bətnindəki döl ölüb. 15 yaşlı qız saat 14 radələrində yaşadığı ünvanda ev şəraitində ölü döl doğduqdan sonra halının pisləşərək komatoz vəziyyətə düşməsi səbəbindən 3 saylı Şəhər Kliniki Xəstəxanasına gətirilib və saat 18 radələrində xəstəxananın reanimasiya şöbəsində ölüb. Mərhumun 10 ay əvvəl 1993-cü il təvəllüdlü Elvin Məmmədov (ad və soyad şərtidir) ilə ailə həyatı qurduğu deyilir.

Məsələ ilə bağlı Sonxeber.az-a Azərbaycan Uşaqlar Birliyinin sədri Kəmalə Ağazadə açıqlama verib.

O bildirib ki, 15 yaşlı qızın 28 yaşlı yoldaşı saxlanılıb:

"Prokurorluq artıq açıqlama verib və bizim əlavə deyə biləcəyimiz bir şey yoxdur. 15 yaşlı qızla qeyri-rəsmi nigahda olan şəxs artıq saxlanılıb.
Mən o barədə yazdığım statusda kimin cəzalandırılacağı barədə fikrimi bildirdim. Bu gün ən böyük cəza valideynə düşməlidir. Amma qanunvericilikdə bu şeylər yoxdur. Nə olacaq? Ən yaxşı halda valideynləri inzibati şəkildə cəzalandıracaqlar. Nəzərə alsaq ki, bu, artıq bir faciə ilə nəticələnib, valideyn də cəzalandırılmalıdır".

ZAİRA AKİFQIZI

Telegramda izləyin