"İranla Azərbaycan arasındakı anlaşılmazlıqlara son qoyuldu" - Seyid Abbas Musəvi

İran İslam Respublikasının Azərbaycandakı Səfirliyinin Mədəniyyət Mərkəzində İran İslam Respublikasının Azərbaycan Respublikasındakı səfiri cənab Seyid Abbas Musəvinin iştirakı ilə mətbuat konfransı keçirilib.

Sonxeber.az-ın məlumatına görə, konfrans İslam İnqilabının qələbəsinin 43-cü ildönümü və iki ölkə arasında diplomatik əlaqələrin qurulmasının 30-cu ildönümü münasibətilə baş tutub.

Jurnalistlərin suallarını cavablandıran səfir bir sıra mühüm məsələlərə də toxunub.

Səfir Seyid Abbas Musəvi bildirib ki, İran və Azərbaycan Respublikası arasında dostluq münasibətlərinə heç vaxt dözməyənlərin düşmənçiliyindən qaynaqlanan bəzi süni anlaşılmazlıqlara son qoyulub:

"İki ölkənin yüksək rütbəli rəsmiləri arasında sıx əlaqələr, siyasi, hərbi və iqtisadi sahədə nümayəndə heyətlərinin çoxsaylı səfərləri və görüşləri bir tərəfdən əlaqələrin yüksək səviyyəsindən xəbər verirsə, digər tərəfdən də bütün bunlar, münasibətlərin və ikitərəfli əməkdaşlığın davam etdirilməsinə və genişləndirilməsinə güclü dəstəkdir. 2021-ci ildə noyabrın 28-də İqtisadi Əməkdaşlıq Təşkilatının (İƏT) 15-ci Zirvə Toplantısı çərçivəsində iki ölkə prezidentlərinin görüşü, münasibətlərdə dönüş nöqtəsi olmaqla yanaşı, iki qardaş ölkə arasında anlaşılmazlıqlar çox qısa sürdü və buna son qoyuldu".

Aysel SƏFƏRZADƏ

Telegramda izləyin