"Azərbaycan ordusu bir tarix yazdı" - Döyüş iştirakçısının təəssüratları

Azərbaycan tarixinin şanlı qələbələrindən biri olan Aprel döyüşlərindən 6 il ötür. 2016-ci ilin aprel ayının 1-dən 2-nə keçən gecə işğalçı Ermənsitan silahlı qüvvələrinin Azərbaycana qarşı törətdiyi növbəti təxribata şanlı Azərbyacan ordusu tərəfindən sürətli əks-hücum əməliyyatı həyata keçirilərək cavab verilib və Ermənistanın işğal altındakı ərazilərdə qurduğu "keçilməz sədd" kimi təqdim edilən müdafiə xəttinin yarılması ilə nəticələn strateji əhəmiyyətli qələbə qazanılıb. Şanlı Aprel qələbəsi Azərbaycan xalqının inamını və ümidlərini özünə qaytarmaqla yanaşı, düşmənin illərdir formalaşdırdığı guya "məğlubedilməz erməni ordusu" mifini də yerlə yeksan etdi.

Bu münasibətlə Sonxeber.az Aprel döyüşlərinin iştirakçısı, ehtiyyatda olan baş leytenant Əhliyət Mehdiyevdən açıqlama alıb.

O bildirib ki, 1 aprel 2016-cı il tarixində düşmən təxribatı pik həddə olub, düşmən dinc əhaliyə qarşı iriçaplı silahlardan istifadə edib və nəticədə dinc sakinlər arasında yaralanan və həyatını itirənlər olub:

"Düşmən təxribatının nəticəsində, Müzəffər Ali Baş Komandanın döyüş əmri ilə ordumuz əks hücum əməliyyatını həyata keçirdi. Füzuli, Cəbrayıl istiqamətində Lələtəpə yüksəkliyinin, eyni zamanda Talış istiqamətində Talış yüksəklilklərinin, Ağdərə, Goranboy və Tərtər istiqamətində yüksəkliklərin işğaldan azad olunması böyük bir uğur oldu. 22 ildən sonra Aprel döyüşləri böyük uğurun başlanğıcı oldu. Xalqımız qələbə sevincini yaşadı, ordumuza olan inam artdı.

Aprel döyüşlərində qısa müddət ərzində düşmənin mövqelərinə ciddi ziyan vuruldu.Tərtər-Goranboy istiqamətində düşmənin 21 postunu darmadağın etdik. Bölmələrimiz sürətli şəkildə düşmənə ağır zərbələr vurdu. Qısa müddətdə düşmənin səngərlərinə girdik və şahidi olduq ki, düşmən müdafiəni gücləndirsə belə, öz yaralı əsgərlərini qoyub qaçır.

Həmin vaxtda xalqımız da öz birliyini nümayiş etdirirdi. On minlərlə gənc könüllü döyüşmək üçün Müdafiə Nazirliyinə müraciət edib. Bu, Dövlət-Ordu-Xalq vəhdətini ən yüksək səviyyədə Aprel döyüşlərində bütün dünyaya nümayiş etdirdi. Bir sözlə, Azərbaycan ordusu bir tarix yazdı.

Təbii ki, biz bu qələbəni qəhrəman şəhid qardaşlarımıza, bizə hər zaman "İrəli" yox, "Ardımca" deməyi bacaran Vüqar Yusubov, Rasim Məmmədov, Yaqub Orucov, Samid Mirzəyev, Elnur Əliyeva və digər komandirlərimizin böyük əməyi olub. Aprel döyüşlərindən sonra bizlər müsahibə verəndə hər zaman bildirirdik ki, Ali Baş Komandanın döyüş əmri ilə biz bütün Qarabağı qısa zamanda işğaldan azad edə bilərik. Zaman keçdi və bu arzumuz özünü doğrultdu. Erməni tərəfi hər zaman təxribatlara əl atırdı.

44 günlük Vətən müharibəsi tam olaraq bizim qələbəmizlə başa çatdı.İlk öncə Murov yüksəkliyi, daha sonra Suqovuşan, Talış kəndi, Cəbrayılın bir neçə kəndi və dəniz səviyyəsindən 1400 m yuxarıda olan Şuşanın alınması erməni ordusunun onurğasını sındırdı və erməni tərəfi məcbur qalıb hərbi kapitulyasiya imzaladı.

44 günlük Vətən müharibəsi Azərbaycanın həm də siyasi qələbəsi idi. Nəticədə Kəlbəcər, Ağdam və Laçın kimi strateji baxımdan önəmli olan rayonlarımız döyüşsüz işğaldan azad oldu.

Biz bu qələbəni Ali Baş Komandana, qəhrəman şəhid qardaşlarımıza, qazi qardaşlarımıza borcluyuq. Onlar öz canları bahasına cənnət məkanı olan Qarabağı işğaldan azad edərək, bizlərə bağışladılar, özləri isə əsl cənnəti qazandılar.

Bir neçə gün öncə Fərrux yüksəkliyinin işğaldan azad olunması qarşıda növbəti böyük hərbi uğurların olacağına bir işarədir".

Aysel Quliyeva

Telegramda izləyin