"Sonxeber.az"da MEDİA-nın tövsiyə etdiyi redaksiya siyasəti və peşə etikası müzakirə olundu - FOTOLAR

Bu gün Sonxeber.az xəbər portalının redaksiyasında Medianın İnkişafı Agentliyi tərəfindən media subyektlərinə göndərilən "Redaksiya siyasəti və peşə etikası qaydaları" ilə bağlı nümunənin müzakirəsi keçirilib.

Sonxeber.az xəbər verir ki, müzakirələr zamanı çıxış edən "BİG Media" MMC-nin direktoru Emil Əkbərov bildirib ki, hər bir jurnalist redaksiya siyasətinə və peşə etikası qaydalarına əməl etməlidir. Həmçinin, jurnalistika prinsiplərindən irəli gələn məsələlərə riayət etmək bu peşə ilə məşğul olan hər kəsin işində hiss olunmalıdır.

E.Əkbərov əlavə edib ki, bu gün peşə prinsiplərinə riayət etməyən media subyektləri gözləmədikləri anda özlərini məhkəmə çəkişməsində görürlər. O, bu mövqedən çıxış edərək, rəhbəri olduğu media orqanının əməkdaşlarına öz tövsiyələrini çatdırıb.

Sonxeber.az xəbər portalının baş redaktoru Aysel Yusifqızı isə qeyd edib ki, redaksiya siyasəti və peşə etikası qaydaları jurnalist prinsiplərindən kənarda deyil:

"Bütün bunlar Azərbaycan Jurnalistlərinin peşə davranışı qaydalarında öz əksini tapıb. Həqiqətə xidmət, informasiya qaynaqlarına sayğılı yanaşma, şərəf və ləyaqətin qorunması, eləcə də jurnalistin özünün və çalışdığı media orqanının reputasiyasının qorunması peşə etikası kodeksi baxımından bu gün də aktualdır. Hər birimiz çalışdığımız media subyektində bu prinsipləri əlimizdə rəhbər tutmalıyıq".

Müzakirələrdən sonra saytda çalışan jurnalistlərə "Redaksiya siyasəti və peşə etikası qaydaları" təqdim olunub.

Telegramda izləyin