"Türkiyə və İsrail münasibətləri böhran dövründən çıxır" - Politoloq

Türkiyə prezidenti Rəcəb Tayyib Ərdoğan bildirib ki, Türkiyə və İsrail arasında Aralıq dənizindəki qaz yataqlarından əldə ediləcək mavi yanacağın Avropaya nəqli sahəsində mümkün əməkdaşlıq barədə danışıqlar keçiriləcək.

Bununla bağlı Sonxeber.az-a politoloq Qabil Hüseynli açıqlama verib.

Onun sözlərinə görə, Rusiya qazının Avropa bazarlarına çıxarılmaması alternativ qaz mənbələrinə ehtiyac yaradacaq:

"Türkiyə və İsrail münasibətləri yaxşılaşmaqdadır. Üstəlik, bu yaxşılaşma ikitərəfli münasibətlərin az qala bütün sahələrini əhatə edir. Türkiyə-İsrail münasibətlərinin yaxşılaşması Avropanın qaz təminatında böyük rol oynayacaq. Çünki Rusiya qazının Avropa bazarlarına çıxarılmaması alternativ qaz mənbələrinə ehtiyac yaradacaq. Bütün bu iqtisadi münasibətlər Türkiyə-İsrail münasibətlərini strateji tərəfdaşlıq səviyyəsinə qaldıra bilər.

Hələ ki, münasibət normallaşmağa doğru gedir. İsaril prezidenti İsaak Hersoq Türkiyəyə, Türkiyənin xarici işlər naziri Mövlud Çavuşoğlu İsrailə rəsmi səfər edib. Bütün bunlar onu göstərir ki, dövlətlərarası münasibətlər böhran dövründən çıxır və yüksəliş dövrünə qədəm qoyur".

Şəbnəm Lətifi

Telegramda izləyin