"Paşinyan sülhdən qaçsa, onu tikə-tikə edəcəklər" – Rusiyalı politoloq

Aprelin 25-dən başlayaraq Ermənistanda kütləvi etiraz aksiyaları keçirilir.

Sonxeber.az Redaktor.az-a istinadən xəbər verir ki, "Müqavimət hərəkatı" adı altında birləşən müxalif qüvvələr Baş nazir Nikol Paşinyanın və onun rəhbərlik etdiyi hökumətinin istefasını tələb edirlər.

Hakimiyyət əleyhinə mitinqlər parlamentdə təmsil olunan müxalifət deputatları, Ermənistanın ikinci prezidenti Robert Köçəryan, sabiq prezident Serj Sarkisyanın başçılıq etdiyi Respublika Partiyası tərəfindən təşkil olunaraq, ölkənin bir sıra bölgələri əhatə edir.

Köçəryan və Sarkisyanın təmsil olunduğu "Qarabağ klanı" revanşist mövqe sərgiləyərək, Paşinyanı sülh danışıqlarında Bakıya güzəştə getməkdə, Ermənistanı təslim etməkdə günahlandırır. Aylardır davam edən etirazlara baxmayaraq, İrəvan rejimi Azərbaycanla sülh müqaviləsinin imzalanmasına tərəfdar olduğunu bəyan edib. Paşinyanın bununla bağlı açıqlamaları Ermənistandakı aksiyaları daha da alovlandırıb.

İndi hər kəsi düşündürən əsas məsələ Paşinyanın etirazlar fonunda hansı addımı atacağıdır. Nikol sonadək sülh mövqeyində qalacaqmı?
Rusiyalı politoloq, Etnik və Beynəlxalq Araşdırmalar Mərkəzinin elmi direktoru, "Arxont" jurnalının baş redaktoru Anton Bredixin Ermənistanda baş verən hadisələri Modern.az-a şərh edib.

Paşinyanın çətin günlər yaşadığını deyən rus politoloq hesab edir ki, "Qarabağ klanı" vəziyyəti gərginləşdirməyə, Azərbaycan və Ermənistan arasında sülh danışıqlarını əngəlləməyə çalışır.

"İndi Nikol Paşinyan vəziyyətin girovuna çevrilib.O bir tərəfdən Qərbin himayəsindədir, Brüssel və Vaşinqtonun diktə etdiyi kursu izləyir. Digər tərəfdən Paşinyanın Rusiya və Azərbaycan qarşısında öhdəlikləri var. Bu gün o, iki seçim qarşısındadır. Əgər sülh müqaviləsini imzalamasa, onu tikə-tikə etmək üçün kütlənin qarşısına verəcəklər. Bu baxımdan hesab edirəm ki, Paşinyan hakimiyyəti seçim etməkdə çətinlik çəkir", - politoloq şərhində bildirib.

Telegramda izləyin