Azərbaycanın PSİXOLOQ BAZARI – "Biri Qərbə, biri Şərqə, biri də bilmirsən hara dartır..."

Çox kreativik. İstənilən məsələyə həmən reaksiya veririk. Özü də yanaşmamız çox orjinal olur. Və yanaşmamızın bəzən dünyada anoloqu olmur. Ən maraqlısı da odur ki, istənilən ideyanı kommersiyalaşdıra bilirik. Məsələn, qloballaşan dünyamızda insanlar hər an streslə üzləşir, psixoloji sarsıntı keçirir.

Təbii ki, bu stresi üzərimizdən atmağa bəzən özümüzdə güc tapa bilmirik. Bu zamansa həkimə, daha doğrusu isə psixoloqa üz tuturuq. Psixoloq da ki, maşallah N qədərdir. Yerindən duran psixoloji yardım məntəqəsi açır. 2-3 nəfəri də yığıb başına caamata "psixoloji yardım" göstərir.

Ən qəribəsi də budur ki, özünü psixoloq kimi cəmiyyətə sırıyanların çoxunun heç bu sahə ilə yaxından-uzaqdan əlaqəsi yoxdur. Məsələn, bu gün çox populyar olan xanım psixoloqlardan biri uzun illər stüardesa kimi çalışıb. Və günlərin birində göylərdən yerə enən xanım psixoloq olmaq qərarına gəlib. Və bu gün ölkəmizin ən bərkgedən psixoloqlarından biridir.
Göz dəyməsin, xanım psixoloqun tərtib etdiyi yardım paketinin qiyməti də pis deyil. Məsələn, ailə-cütlük terapiyaları və sindromlar, psixoloji narahatlıqlar üsrə seansın 1 saatı 150, cinsəllik və cinsi disfunksiyalar üzrə 1 saatlıq seans 200, daxilə baxış-özünü dərk etmə üzrə 1 saatlıq seans 300 (!) manat və s. Əgər pasiyent əcnəbidirsə onda o bütün xidmətlər üzrə əlavə 100 manatından keçməlidir.

Göründüyü kimi psixoloqlarımızın qiymət siyasəti də pis deyil. Di gəl ki, ortada psixoloji yardım yoxdur.

Psixoloqun yanına gedəndən sonra əvvəlki durumdan çıxdığını və yaxud fikrinin dəyişdiyini söyləyən çox az adama rast gəlirik.

Məsələnin digər təəssüf doğuran tərəfi odur ki, psixoloqların pasiyentə yanaşma tərzləri də fərqlidir. Hərə təhsil aldığı ölkələrin mental xüsusiyyətləri ilə pasiyentə yaxınlaşır. Məsələn, Avropa təhsili alan psixoloqlar psixoloji yardımdan daha çox gender bərabərliyini təbliğ edirlər.

Problemdən çıxış yolu kimi qadının şərti azadlığını əsas gətirirlər. Təəssüf ki, psixoloqlarımızın sırasında feministlər də kifayət qədərdir.

Məsələ ilə bağlı Bizim.Media ilə fikirlərini bölüşən tanınmış sosioloq Əhməd Qəşəmoğlu bildirib ki, "bəzən məndən müsahibə alanda, hansısa psixoloqdan da fikir alırlar. Baxıram, mat qalıram. Kitab cümlələriynən danışırlar. Qardaş, psixoloq həyatı bilməlidir. İndi qəribə dəb yaranıb.

Deyirlər ki, filankəs Amerikada, və yaxud Fransada qurtarıb gəlib. Əsas odur ki, o işinin peşəkarı olsun, savadlı olsun. Xaricdə təhsil almaq yaxşıdır, amma öz xaqlnın məxsusi xüsusiyyətlərini bilmədən psixoloq danışa bilməz.

Biri Qərbə, biri Şərqə, biri də bilmirsən hara dartır. Biri bir test çap elətdirir, gələnin qarşısına qoyur. Psixoloq imtahan götürən müəllim deyil, stresi götürən təbibdir. Çox təəssüf ki, bizdə psixoloqlar özlərini müəllim kimi aparır. Pasiyenti müalicə eləmir, ona yeni şeylər öyrədir. Vəssəlam...".

Bu günkü psixoloqların bəziləri qədimdəki cindarları xatırladır. Onlar insanları ətrafındakı yaxşı şeylərdən qidalanmağı, onlara sarılmağı yox, gündə onun yanına gəlib, hazırladığı prodseduru qəbul etməyi tövsiyyə edirlər. Bəzi psixoloqlar hətta masaj xidmətləri də göstərir. Guyaki, psixoloji problemi masajla atmaq olur. Bu isə sadəcə savadsızlıq nümunəsidir.

Bu məsələnin ən ağrılı tərəfi isə odur ki, psixoloqlar çox zaman ailə dəyərlərini baltalayırlar. Sevginin azadllığını təbliğ edirlər. Pasiyentə şəxsi hisslərini övlada, ata-anaya və ailə başçısına sevgi və hörmətdən daha üstün tutmağı tövsiyyə edirlər.
Ona görə də hazırda qadınlarımız boşanmaya əvvəlki illərdən daha çox həvəs göstərirlər. Bu da ondan irəli gəlir ki, bəzi psixoloji məntəqələr qrant alır. Qrantlar isə elə-belə verilmir.../Bizim.Media

Telegramda izləyin