"Ali Baş Komandan və Azərbaycanın Müzəffər Ordusu 44 gün ərzində düşmənin necə qorxaq olduğunu bütün dünyaya sübut etdi" - Deputat

"Bu gün bizim üçün ikiqat bayramdır. Çünki iki ildir ki, biz 8 noyabrı Şuşamızın işğaldan azad olunduğu və Zəfər günü kimi qeyd edirik".

Bunu Sonxeber.az-a danışan deputat Cavanşir Paşazadə bildirib.

Deputat qeyd edib ki, Ali Baş Komandan İlham Əliyevin rəhbərliyi ilə Müzəffər Azərbaycan Ordusu 44 günlük Vətən müharibəsində tək torpaqlarımızı azad etmədi, həm də düşmənin necə cılız və qorxaq olduğunu bütün dünyaya sübut etdi:

"Tarix boyu havadarların arxasında aslana dönən Ermənistan 44 gün ərzində döyüş meydanında Azərbaycan ordusu qarşısından qorxaq kimi qaçaraq necə cılız millət olduqlarını göstərdilər. Cənab prezident İlham Əliyev ölkə başçısı seçildiyi gündən xalqımıza verdiyi sözü tutaraq bütün sahələrdə islahatlar aparmış, bugünkü zəfərin əldə edilməsi istiqamətində lazımı addımları atıbdır. Əsasən də ordu quruculuğu sahəsində. Məhz bu addımlar sayəsində biz öz gücümüzə 30 illik işğala son qoyaraq Qarabağı sahibinə geri qaytardıq. Paşinyan və erməni xalqı yaxşı anlayırdı ki, Azərbaycan işğala barışmayacaq və Qarabağı onlara güzəştə getməyəcək. Təlxək Paşinyanın Cıdır düzündə yallı getməsi xalqımızın səbrinin daşmasının son damlası oldu".

Deputat vurğulayıb ki, Azərbaycan 44 günlük Vətən müharibəsində torpaqlarına qovuşaraq regionda əbədi sülhə nail oldu:

"44 gün ərzində Ali Baş Komandan İlham Əliyevin müdrik siyasəti nəticəsində biz tək müharibə meydanında deyil, həm diplomatik və informasiya savaşından qalib çıxdıq. Bütün təzyiqlər qarşında tək başına möhkəm dayanana cənab prezident İlham Əliyev atasına və xalqımıza verdiyi sözü tutaraq ərazi bütövlüyümüzün bərpasına nail oldu. 44 gün ərzində cənab prezidentin xalqa müraciətini və torpaqlarımızın işğaldan azad olunması xəbərini gözyaşları içində izləyirdik.Bugünkü bu möhtəşəm Zəfəri bizə yaşadan Ali Baş Komandana, qanları ilə tarix yazan Azərbaycanın mərd oğullarına təşəkkür edirəm. Allah şəhidlərimizə rəhmət, qazilərimizə şəfa versin".

Aysel Yusifqızı

Telegramda izləyin