Səhər Bakı metrosunda qatar niyə 20 dəqiqə gecikib? - RƏSMİ AÇIQLAMA

Bu gün səhər saatlarında Bakı metrosunda qatar 20 dəqiqə gecikib.

BiG.AZ xəbər verir ki, intervalda gecikmə metronun "Xətai" stansiyasında qeydə alınıb.

Məsələ ilə bağlı "Bakı Metropoliteni" QSC-nin mətbuat xidmətinin rəhbəri Bəxtiyar Məmmədov BiG.AZ-a bildirib ki, sözügedən stansiyada qatarda hər hansı bir nasazlıq yaranmayıb. Qatarın gecikməsinə səbəb qatarlarda diaqnostika işlərinin aparılması olub.

"Bu gün metronun yaşıl və qırmızı xətlərini diaqnostika kompleksi yoxlayıb. Diaqnostika kompleksi bizdə ay ərzində iki dəfə xəttə çıxır, Metropolitenin müxtəlif parametrlər üzrə bütün infrastrukturunu yoxlayır. Diaqnostika qatarı Cəfər Cabbarlı-Xətai sahəsinə də gedir. Bu zaman orada həmin halda interval bir qədər böyüyür.

Bu qatar oraya mütləq ay ərzində iki dəfə daxil olur ki, infrastruktur yoxlanılsın. Burada da qatarların xəttə verilməsi, çıxarılması bir az vaxt alır. Yəni qatar dalandan çıxarılır və sahəyə göndərilir. Daha sonra diaqnostika qatarı həmin sahəyə girir və dalana daxil olur, çünki bütün yol olan infrastrukturun hamısını, tunellər də daxil olmaqla, yoxlayır. Bundan sonra qatar yola çıxır və qayıdaraq yaşıl, qırmızı xətlər üzrə yoluna davam edir. Həmin sahəni xətt qatarı yoxlayır. Amma hər hansı bir problem, nasazlıq, yəni neqativ hallar olmayıb".

Telegramda izləyin