"Cənab prezidentin Şuşa ilə bağlı bu sərəncamı bütün türk dünyasının birlik və həmrəyliyinin yeni rəmzinə çevriləcək" - DEPUTAT

Xəbər verdiyimiz kimi Prezident İlham Əliyev Şuşa şəhərinin 2023-cü il üçün "Türk dünyasının mədəniyyət paytaxtı" elan edilməsi ilə bağlı tədbirlər haqqında Sərəncam imzalayıb.

Bununla bağlı Sonxeber.az-a danışan deputat İqbal Məmmədov bildirib ki, Şuşa Azərbaycan mədəniyyətinin beşiyi, Qafqazın incisi, müasir sivilizasiyanın mədəniyyət xəzinələrindən, mənəviyyat nümunələrindəndir:

"2020-ci ilin noyabrın 8-də Azərbaycan Prezidenti, Silahlı Qüvvələrin Ali Baş Komandanı İlham Əliyevin "Əziz Şuşa, sən azadsan! Əziz Şuşa, biz qayıtdıq! Əziz Şuşa, biz səni dirçəldəcəyik!" ifadələri Azərbaycan xalqının bütün acılarını dindirdi. Şuşa şəhəri 1992-ci ilin mayın 8-də ermənilər tərəfindən işğal olunmuşdu. İşğal illərində erməni vandalizmi şəhərdəki Azərbaycan izlərini, şəhərin həqiqi tarixini məhv etməyə çalışsalar da, bunu bacarmadı. Şuşanın erməni vəhşiliyindən geriyə qalan hər daşında, torpağında belə Azərbaycanın ruhu duyulur. Azərbaycan xalqı heç vaxt Şuşanın işğalı ilə barışa bilməzdi və buna gec-tez son qoymalı idi.30 ildən sonra Şuşa Ali Baş Komandan İlham Əliyev rəhbərliyi ilə Azerbaycanın Müzəffər Ordusu tərəfindən işğaldan azad edildi. Vətən müharibəsi dövründə Şuşa döyüşləri tarixə qəhrəmanlıq dastanı kimi həkk olunub. Çünki Şuşa döyüşləri İkinci Qarabağ müharibəsində Azərbaycan Ordusunun qələbəsi ilə nəticələnən ən uğurlu əməliyyatlardan biridir. Belə ki, sıldırım qayaları dırmaşaraq əlbəyaxa döyüşlər həyata keçirən Azərbaycanın igid oğulları Şuşadan Ermənistan hərbi birləşmələrini bir gün ərzində məhv etdi. Bilirsiniz ki, Şuşa döyüşlərini xarici hərbi ekspertlər əfsanə adlandırdılar. Məhz buna görə də Şuşa döyüşləri tək Azərbaycanın deyil, dünya tarixinə qəhrəmanlıq dastanı kimi həkk oldu".

Deputat vurğulayıb ki, Şuşanın Türk dünyasının mədəniyyət paytaxtı elan olunması bu dövlətlər arasındakı əməkdaşlığı inkişaf etdirəcək:

"Şuşa Azərbaycanın mədəniyyət beşiyidir.Hesab edirəm ki, Azərbaycan xalqı üçün yüksək mədəni-mənəvi dəyər kəsb edən Şuşa ilə bağlı bu qərar bütün türk dünyasının birlik və həmrəyliyinin yeni rəmzinə çevriləcək. Ən önəmlisi isə türk xalqları arasında əməkdaşlıq perspektivlərini daha da genişləndirəcək".

Aysel Yusifqızı

Telegramda izləyin