"Avroviziya"nın Azərbaycan deleqasiyasından getdi

"Bu gündən etibarən "Avroviziya" müsabiqəsinin Azərbaycan deleqasiyasına rəhbərlik etmirəm. Bu layihə ilə bağlı mənim 2009-cu ildən başlayaraq yalnız ən xoş təəssüratlarım və xatirələrim var, amma artıq irəliyə doğru getməyin vaxtıdır. Artıq bir neçə il üzərində işlədiyim layihələrin reallaşmasına vaxt ayıracağam".

Axşam.az xəbər verir ki, bu sözləri "Avroviziya"da Azərbaycan nümayəndə heyətinin rəhbəri İsa Məlikov sosial şəbəkə hesabında yazıb. O, bundan sonra yarışmada Azərbaycan delaqasiyasında olmayacağını bildirib:

"Avroviziya" müsabiqəsində Azərbaycanı təmsil edən, birlikdə işlədiyim hər kəsə minnətdaram. Bu, mənə unudulmaz təcrübə və inanılmaz emosiyalar qazandırdı. Hər birinizin bu layihədə buraxdığınız dəyərli izi, özünüzün dəyərli parçası var".

İ.Məlikov əlavə edib ki, özünün başqa layihələri var:

"Gələn il, nəhayət ki, ilk müəllif konsertimi reallaşdırmağı planlaşdırıram. Yeni ildən dərhal sonra onun hazırlıqlarına başlayacağam. Eyni zamanda, daha bir layihənin startı gözlənilir, amma bu hələ sirrdir. İTV telekanalı və xüsusi ilə də kanalın rəhbərliyi ilə münasibətlərimiz möhtəşəm formalaşıb. İrəlidə bir çox planımız var və 2023-də xeyli maraqlı istiqamətlərdə çalışacağıq".

Telegramda izləyin