"Təşkil olunacaq tədbirləri qələbəmizin ümumi türk aləmində qeyd olunması kimi də qiymətləndirmək olar" - DEPUTAT

Xəbər verdiyimiz kimi Prezident İlham Əliyev Şuşa şəhərinin 2023-cü il üçün "Türk dünyasının mədəniyyət paytaxtı" elan edilməsi ilə bağlı tədbirlər haqqında Sərəncam imzalayıb.

Bununla bağlı Sonxeber.az-a danışan deputat Müşfiq Cəfərov bildirib ki, bu ilin mart ayında Türkiyə Respublikasının Bursa şəhərində Beynəlxalq Türk Mədəniyyəti Təşkilatına üzv ölkələrin Mədəniyyət Nazirlərinin Daimi Şurasının növbədənkənar iclasında Azərbaycanın mədəniyyət paytaxtı Şuşa şəhəri 2023-cü il üçün "Türk dünyasının mədəniyyət paytaxtı" elan edilib:

"TÜRKSOY Türk dünyasının mədəniyyəti və irsinin qorunmasında türk xalqları arasında həmrəylik və qarşılıqlı anlaşmanın daha da möhkəmləndirməsində əhəmiyyətli rola malikdir. Bu təşkilatın türk dünyasının görkəmli şəxsiyyətlərinin təbliğində də yüksək xidmətləri olub. Təşkilat tərəfindən Azərbaycanın tanınmış ədəbiyyat və mədəniyyət xadimlərinə xüsusi diqqət göstərilib. Bütün bunlarla yanaşı, Türk dünyası mədəniyyət proqramları çərçivəsində Azərbaycanın qədim mədəniyyət ocaqlarından biri olan Şuşa şəhərinin 2023-cü il üçün "Türk Dünyasının Mədəniyyət Paytaxtı" elan olunmasını Türk-İslam dünyasının Azərbaycanın qədim şəhərinin mədəni zənginliyinə diqqətinin daha bir göstəricisi olmaqla yanaşı qardaş ölkələrin Azərbaycanın qələbəsinə verdiyi əhəmiyyətin ifadəsidir. Mən ümid edirəm ki, TÜRKSOY tezliklə bütün türk dünyasının vahid ortaq mədəniyyət nümunələrinin beynəlxalq miqyasda təbliğinə də nail olacaqdır.

Dünən isə cənab prezident 2023-cü il üçün "Türk dünyasının mədəniyyət paytaxtı" elan edilən Şuşa şəhəriylə bağlı tədbirlər planının hazırlanması haqqında sərəncam imzaladı. Təşkil olunacaq bu tədbirləri qələbəmizin ümumi türk aləmində qeyd olunması kimi xarakterizə edə bilərəm".

Aysel Yusifqızı

Telegramda izləyin