"Şuşa-Xankəndi yolunda keçirilən etiraz aksiyası ancaq müsbət nəticə olarsa sonlandırıla bilər"- DEPUTAT

Qarabağda faydalı qazıntı yataqlarının qanunsuz istismarı əleyhinə Şuşa-Xankəndi yolunda keçirilən etiraz aksiyası dörd gündür ki, davam edir. Dünən aksiyada maraqlı anlar yaşanıb. Belə ki, 44 ədəd sülh göyərçini göyə buraxılıb. Bu gün hər kəsi maraqlandıran sual Şuşa-Xankəndi yolunda keçirilən aksiyanın nə zaman bitəcəyidir.

Bununla bağlı Sonxeber.az-a danışan deputat Nəsib Məhəməliyev bildirib ki, göyərçin, bütün dünyada sülh rəmzi olaraq qəbul edilir:

"Xankəndi yolunda keçirilən aksiyada iştirak edən vətəndaşlarımız tərəfindən 44 ədəd göyərçinin havaya buraxılması, ermənilərə və Rusiyalı sülhməramlılara verilmiş sülhpərvər mesaj kimi qəbul edilməlidir. Bu hadisə bir daha göstərdi ki, Azərbaycan xalqı problemlərin sivil yolla həllində maraqlıdır. Eyni zamanda, öz hüquqlarını müdafiə edəcək, təbii sərvətlərinin talanmasına imkan verməyəcəkdir.

Aksiya, ancaq və ancaq müsbət nəticə olduğu halda sonlana bilər. Çətin də olsa, aksiyalar davam etdirilməlidir. Başqa yol yoxdur. Ekoloqlarımız, digər dövlət orqanlarımız öz təsərrüfatlarında monitorinq keçirməli, güc strukturlarımız Laçın dəhlizini nəzarətə götürməlidirlər".

Aysel Yusifqızı

Telegramda izləyin