"Bu məsələ ortaya çıxmasaydı onu yetkinlik yaşına çatmadan evləndirəcəkdilər"

Gədəbəydə 17 yaşlı qızla 50 yaşlı kişinin nişanlanması barədə xəbər vermişdik. Məlumata görə, 17 yaşı qız 50 yaşlı Elfaq Şəkərbəyli ərə verilir.

Yetkinlik yaşına çatmayan qızın özündən yaşca çox böyük olan kişi ilə nişanlanması günlərdir, sosial şəbəkələrdə müzakirə mövzusuna çevrildi. Mediada yayılan və efirdə müzakirəyə çıxarılan olay birmənalı qarşılanmayıb və ictimai qınaq obyektinə çevrilib. Bəzi fikir sahibləri bildirib ki, yaş və ailə müzakirəsi etik olmayan mövzulardır. Digərləri hesab edir ki, ictimai qınağın bu məsələlərdə rolu var və belə hallar cəmiyyətə mənfi təsir edir.

Belə hallarda şəxsi həyat və ailə məsələlərinin müzakirə olunması düzgündürmü?

Sosioloq Lalə Mehralı BiG.AZ-a açıqlamasında bildirib ki, 17 yaşlı bir qızın atasından da böyük biri ilə evləndirilməsi hər tərəfdən yanlış addımdır və bu vəziyyətlərdə ictimai qınaq olmalıdır:

"O qızın 23 yaşı olma ehtimalı məsələsi müzakirə olundu. Mən fikirləşdim ki, onun 23 yaşı varsa, həmin insan normal qərar verə bilər. Ola bilər də insandı. Tutaq ki, istəyib, könlü tutub. Çünki 23 yaşında bir insan azad qərar verə bilmə dərrakəsinə malikdir. Amma sonra qızın hələ 17 yaşında olması və efirdə ötkəm danışması məni öz düşüncəmdən çəkindirdi. Çünki həm yetkinlik yaşına çatmayıb, həm də efirdə yetkinlik yaşına aid olmayan fikirlər səsləndirdi. El arasında "Sanki böyüyüb kiçilib" misalı var. Misaldakı kimi elə bil, həmin qız böyüyüb, qocalıb yaşlanıb və təzədən 17 yaşına qayıdıb. Yəni elə bir fikirlərlə orada özünü müdafiə etməyə çalışdı.

Diqqət etsək, danışanda anasının fikirlərini diqtə edirdi. Ana və qız, hər ikisi də eyni tərzdə danışırdılar, üslubları eyni idi. Ona görə təsir altında olaraq belə bir qərar verdiyi qənaətinə gəlirik. Yəni tək mən yox, cəmiyyət, düşüncə bu yöndədir. 17 yaşlı bir qızın atasından da böyük biri ilə ailə qurması məntiqə sığmır və nə etik cəhətdən, nə də mənəvi dəyərlər cəhətdən doğrudur. Yəni hansı tərəfinə çevirsək yanlış addımdır.

Bu insanlar fərqli zaman qurşağının yetirmələridir, fərqli zamanlarda doğulublar, tərbiyə, dünya baxışı, düşüncə tərzi tamamilə bir-birindən əks olan fərdlərdir. Təbii ki, ayrı-ayrı ayrılıqda hər ikisi yaxşı insan ola bilər, amma onların birlikdə ailə həyatının nə qədər uğurlu olacağı müzakirə məsələsidir. Əgər qız yetkinlik yaşı içərisində olsaydı, yəni əvvəlcə 23 yaşında olduğu deyildi və belə olan halda bu qərarı sorğulamaq heç birimizə düşməzdi. Düzdür, yaş fərqinə görə onların izdivacını yenə də etik hesab etmirik. Amma o yaş yenə də yetkinlik yaşına çatmış bir insan kimi öz qərarını verə biləcək yaşdır. Amma 17 yaşı yeni olmuş qızın efirdə o cür üslubla danışması onun təsir altında olduğu düşüncəsinə gətirib çıxardı. Hesab edirəm ki, o qız təsir altındadır və bu məsələ mətbuata çıxmasaydı onu yetkinlik yaşına çatmadan evləndirəcəkdilər. Mətbuatda yayıldı deyə hazırda qızın 18 yaşının olmasını gözləyəcəklər. Onun 18 yaşı hələ olmayıb, çünki orada o, iddia irəli sürdü ki, "Biz hələ evlənmirik, mənim 18 yaşımının olmasını gözləyirik". Düzdür, bizim qanunlarımız bəzi istisna hallarda 17 yaşında nikaha icazə verir. Amma burada elə bir istisna hal yoxdur. Üstəlik də fövqəladə vəziyyət kimi bir şeydir. Yəni sıradan bir vəziyyət deyil ki, icazə verilsin. Məncə, bu cür vəziyyətlərdə ictimai qınaq əhəmiyyətlidir, önəmlidir. Sadəcə təhqir etmədən olmalıdır. Nəzərə almaq lazımdır ki, o qız azyaşlıdır və təsir altında ola bilər".

Telegramda izləyin