"Suni şəkildə qiymətləri artıraraq vətəndaşların cibinə girənlər sərt şəkildə cəzalandırılmalıdır" - DEPUTAT

"Suni şəkildə bazarlarda qiymətləri artıranlar qanun çərçivəsində cəzalandırılmalıdır".

Bunu Sonxeber.az-a danışan deputat Cavanşir Paşazadə bildirib.

Deputat qeyd edib ki, cənab prezident İlham Əliyevin yanvarın 5-də imzaladığı müvafiq sərəncamı ilə Azərbaycanda minimal əmək haqqı 345, pensiya isə 280 manata qaldırıldı:

"Bu gün dövlətimizin əsas məqsədi insanlarımızın sosial durumunun yaxşılaşdırılmasıdır. Bunun üçün də son 4 ildə sosial sahədə islahatların tərkib hissəsi kimi, minimum əməkhaqqı 2,7 dəfə artırılaraq 130 manatdan 345 manata, pensiya isə 2,5 dəfə artırılaraq 110 manatdan 280 manata çatdırılıb. Cənab prezident İlham Əliyev çıxışlarında dəfələrlə qeyd edib ki, sosial siyasət Azərbaycanın dövlət siyasətinin ayrılmaz hissəsidir: "Bizim siyasətimizin mərkəzində Azərbaycan vətəndaşı dayanır". Məhz buna görə də ölkə başçısı tərəfindən əhalinin rifah halının yaxşılaşdırılması istiqamətində hər zaman mühüm addımlar atılır".

Deputat vurğulayıb ki, təəssüf ki, pensiya və maaşlar artan kimi bəzi işbazlar bazarlarda qiymətləri süni şəkildə artırır:

"Əlbəttə ki, qiymət artımı hər kəs kimi məni də narahat edir. Hər gün qiymətlərin süni şəkildə artırılması haqlı olaraq vətəndaşların narazılığına səbəb olur. Düşünürəm ki, müvafiq qurumlar suni qiymət artımı ilə bağlı mübarizəni artırmalı, vətəndaşların cibinə girənlər sərt şəkildə cəzalandırılmalıdır. Bu yola həm də biz dövlətimizin vətəndaşlarımızın sosial durumunun yaxşılaşdırılması istiqamətində atdığı addımlara dəstək olmuş olarıq".

Aysel Yusifqızı

Telegramda izləyin