Binəqədidə obyektləri yanan sahibkarlara kompensasiya ödəniləcəkmi - AÇIQLAMA

"Binəqədi rayonunda və "Taxta" bazarında yanğın ilə bağlı bir neçə obyekt əgər sığortalı olubsa bir neçə sığorta məhsulu ola bilərdi. Daşınmaz əmlakın icbari sığortası və istismarı ilə bağlı mülki məsuliyyətin icbari sığortası qarşı tərəfə dəyən ziyan ilə bağlı olur. Digər bir sığorta növü isə daşınar əmlakın könüllü sığortasıdır. Qeyd etdiyimiz bu iki sığorta növü sahibkar tərəfindən sənədi varsa bütün obyekt sığortalanır".

Bu sözləri Sonxeber.az-a açıqlamasında sığorta məsələləri üzrə ekspert İlkin İbrahimov deyib. Ekspert bildirib ki, daşınmaz əmlakın icbari sığortası əgər obyekti sığortalayırsa, mülki məsuliyyətin istismarı ilə bağlı icbari sığorta isə qarşı tərəfə, üçüncü tərəfə dəyən ziyanı kompensasiya edir:

"Hansı ki, yanğın baş verən obyektdə satış məqsədilə gətirilən tikinti materialları daşınar əmlakın könüllü sığortası ilə sığortalanmalıdır. Bütün bu məsələlər ilə bağlı qeyd etmək istəyərdim ki, əvvəlki yanğın hadisələri ilə bağlı əlaqəli olaraq çox böyük ehtimalla həmin obyekt sənədli deyil. FHN-dən yanğın aktı olmalıdır və həmin obyekti ilə bağlı yanğın aktı olmadığına görə orada heç bir sığorta şirkəti həmin obyektləri sığortalamamışdı. Əgər sığortalanma olmalıdırsa, həmin obyektin sənədi olmalı və FHN-dən yanğın təhlükəsizliyi qaydaları ilə bağlı aktı olmalıdır".

İlkin İbrahimovun sözlərinə görə, bununla yanaşı, sahibkarların VÖEN fəaliyyətində hər ay gətirdikləri sənədləşmədə mədaxil və məxariclər qeyd olunmalıdır:

"Bundan sonra sığorta şirkətləri həmin yerdə sığortalanmanı həyata keçirə bilərlər. Yanğın bölgəsində hansı ki, ölüm hadisəsi baş verib. Ölüm hadisəsi ilə bağlı mühafizəçi qeyd edirlər. Həmin şəxsin əmək müqaviləsi varsa o zaman istehsalatda baş vermiş bədbəxt hadisə ilə bağlı icbari sığorta növümüz var. Burada əmək müqaviləsi ilə yanaşı, məcburi qaydada əmək müfəttişliyi nəzarət edir və həmin sığorta məhsulu işçilərə təqdim olunur. Həmin yerdə əmək müqaviləsi olmadığından bu sığorta növüdə tətbiq edilməyəcək. Ölən şəxs ilə bağlı əgər ona kompensasiya verilməlidirsə, onda o zaman qeyri-rəsmi onu işə götürən sahibkardan tələb olunmalıdır".

Sevda Səfərova

Telegramda izləyin