Uşağınıza yeni il hədiyyəsi alarkən DİQQƏTLİ OLUN- HƏKİM AÇIQLADI

Bayram günlərində verilən hədiyyələr yaddaqalan və mənalı olur. Yeni ildə paketlənmiş qutularda verilən hədiyyələr uşaqları daha çox həyəcanlandırır. Lakin, bu hədiyyə qutuları və onların içərisində olan qidaların keyfiyyəti sual doğurur. Məlum olduğu kimi, qablaşdırma materiallarının istehsalında istifadə edilən bəzi kimyəvi maddələr qidaya keçə bilər. Qablaşdırma prosesində qidaların mikroblarla çirklənməsi də mümkündür.

Mövzu ilə bağlı terapevt Mətanət Cəfərova Sonxeber.az-a açıqlama verib. Onun sözlərinə görə, sözügedən qutuların içərisində şirniyyatlar və karbohidratlar olur. Bəzilərinin keyfiyyəti bir o qədər yüksək olmur:

"Həmin qutulara meyvə qoyulursa, həmin meyvənin hansı dərəcədə yuyulması və təmizlənməsi sual altındadır. Oradan çıxarılan meyvə yuyulub təmizləndikdən sonra yeyilə bilər. Onların tərkibinə gəldikdə isə bu bayram günlərində uşaqların qutuların içərisindəki qidaları yeməkləri məqsədəuyğun deyil. Məqsədəuyğundur ki, valideyn onu övladı üçün daha sağlıqlı şəkildə düzəltsin. Qidalar yüksək karbohidrat tərkiblidir. Ən problemlisi orada olan keyfiyyət məsələsidir. Keyfiyyəti aşağı olan qidalar uşaqlarda mədə-bağırsaq sisteminin pozulmasına səbəb ola bilər. İshalın olması, ürəkbulanma və qusma halları verə bilər. Əgər istifadə müddəti keçmiş məhsullardısa hətta zəhərlənmə belə baş verə bilər. Allergik reaksiyaları olanlar, köklüyə meyillik göstərən uşaqların bu qidaları qəbul etməsi məqsədəuyğun deyil. Qablaşdırılmamış şəkildə meyvələr və çərəzlər qoyularsa risk qrupuna daxil olan uşaqlara verilməsi düzgün deyil. Qidanı qəbul edən uşaqların bakteriyal çirklənmə nəticəsində mədə-bağırsağında xoşagəlməz hallar baş verir".

Sevda Səfərova

Telegramda izləyin