Çoxuşaqlı ailələr dövlət tərəfindən mənzillə təmin edilə bilər? - AÇIQLAMA

"Azərbaycanda uşaqların sosial müdafiəsi və təminatı dövlətimizin yürütdüyü siyasətin ən ümdə prioritetlərindən biridir. Son illərdə aparılan iqtisadi-sosial islahatlarlar nəticəsində uşaqların sosial müdafiəsi istiqamətində müxtəlif addımlar atılıb, xüsusilə də çoxuşaqlı ailələrə dövlət tərəfindən müxtəlif sosial müdafiə tədbirləri həyata keçirilməkdədir. Neçə ildir ki, verilən ünvanlı sosial yardımın böyük bir hissəsi məhz uşaqların sosial təminatının bir hissəsidir. Belə ki, həmin yardımın ən azı 60 faizi, uşaqları əhatə edir. Bundan başqa uşaqların sosial müdafiəsi istiqamətində bir neçə müavinət verilir. Eləcə də, beşdən çox uşağı olan ailələrə ayrıca dövlət müavinəti təyin edilib. 2023-cü il yanvarın 1-dən həmin ailələrin müavinətləri 15 faiz artırlıb. Eləcə də uşaqlara verilən digər müavinətlərin məbləği də don bir ildə 15-20 faiz artırılıb ki, bu da sosial qayğının təzahürüdür".

Bu sözləri Sonxeber.az-a açıqlamasında Milli Məclisin İqtisadi siyasət, sənaye və sahibkarlıq komitəsinin üzvü Aydın Hüseynov bildirib. Millət vəkili qeyd edib ki, ölkəmizdə demoqrafik vəziyyət kifayət qədər qənaətbəxşdir, təbii artım NDB və digər ölkələrlə müqayisədə xeyli dayanıqlıdır, əhalinin artımı hər il yüksəlir:

"Digər ölkələrdə demokratik vəziyyət pisləşdiyindən onlar ailə institutunun möhkəmlənməsi, uşaqların doğumunun stimullaşdırılması üçün müxtəlif dəstək proqramları həyata keçirir. Məsələn, Rusiya Federasiyası və Belarus hökuməti uşaqların doğum səviyyəsini artırmaq üçün ailələrə mənzil güzəştini tətbiq etməyi əsas stimullaşdırıcı vasitələrdən biri hesab edir. Bu ölkələrdə 4 və 5 uşağı olan ailələrə dövlət tərəfindən mənzil verilməsi nəzərdə tutulur. Bu layihə əlbəttə demoqrafik siyasətin tərkib hissəsi kimi mühüm əhəmiyyət kəsb edir.
Azərbaycan hökuməti də gənc ailələrə güzəştli ipoteka yolu ilə onların mənzil şəraitinin yaxşılaşdırılması üçün addımlar atır. Son illərdə MİDA-nın güzəştli mənzil proqramı çərçivəsində yüzlərlə gənc ailə mənzillərlə təmin olunub və s. Yəni Azərbaycanda da ailələrə digər güzəştli alətləri ilə sosial dəstək verilir".

Sevda Səfərova

Telegramda izləyin