Efirlərdə "qucaq şousu, dombalaq aşma, qalmaqallar" - SİYAHI

Televiziya kanalları həqiqi informasiyadan uzaqlaşaraq bayağı hərəkətlər , qeyri-peşəkar verilişlər ilə öz nüfuzunu itirir. Verilişlərdən inciyib efiri tərk edən müğənnilər, o cümlədən aparıcının müğənnini qucağına alması və s. Təbii ki, aparıcıların hərəkətlərinə fikir verməməyi, mədəniyyət sərhədlərindən kənara çıxmaq, jarqon ifadələrdən istifadə etmək artıq adət halını alıb. Sonxeber.az sözügedən qalmaqalları və şou xatirinə edilən bayağı görüntüləri təqdim edir:
Vaxtilə anınmış tele-aparıcı Mətanət Əliverdiyevanın canlı yayımda "şpaqat" açma hərəkəti hər kəsi şoka salmışdı. Aparıcının qeyri-ciddi hərəkəti zalda olan tamaşaçılar tərəfindən alqışlansa da, mətbuatda və sosial şəbəkələrdə tənqidlə qarşılandı.
Açıqlamaları ilə gündəmdən düşməyən müğənni Nadir Qafarzadə "Dalğa" TV-də yayımlanan "Zümrüdlə gün ortası" verilişində yoqa etməsi ilə gündəmə gəlmişdi. yoqa məşqçisinin yardımı ilə başı üstdə dayanmağa çalışan Nadir "Ay bala, lütləndim, hər şeyimi gördünüz" deyərək qonaqların üzünü güldürsə də, izləyiciləri qəzəbləndirib. Nadir Qafarzadənin bu hərəkətini ona yaraşdırmayıblar və efir etiketinə zidd olduğunu yazıblar.
Xəzər TV-də yayımlanan "Hər şey daxil" verilişində gözlənilməz şouların şahidi olmuşuq. Canlı yayımda proqramın aparıcısı Tarix Əliyev "yıxılan ulduz" trendinə qoşularaq qəfildən yerə yıxılmışdı. Verilişdə qonaq olan tanınmışlar əvvəlcə Tolikin bu hərəkətinə təəccübləniblər, daha sonra zarafat etdiyini görüb geri çəkiliblər. Bu zaman musiqi ifa edən Niyam Salami də Tolikə qoşulub və yerdə oturub. İzləyicilər isə hər iki məşhuru efirə yaraşmayan addım atdıqları üçün qınayıblar.
Efirlərdə şoularla birlikdə qalmaqallarda səngimək bilmir. Xəzər TV-də yayımlanan "Təsir dairəsi" verilişində qalmaqal yaranmışdı. Hadisə isə verilişdə ekspert qismində əyləşən Anar Vəziroğlu və vəkil Şəfiqə Nağıyeva arasında baş verib. Anar Vəziroğlu "Bu qadında ləyaqət yoxdur" deyərək Şəfiqə Nağıyevanın üstünə su atıb. Sözügedən hadisədən sonra ekspert proqramdan uzaqlaşdırılıb.
"Zaurla Günaydın" verilişində belə təəccüblü hallara rast gəlinib. Proqramın qonağı əməkdar artist Əkbər Əlizadə beli ağrıdığını deyib. Aparıcı Zaur Baxşəliyev onu yerə uzadıb və aşıq Telli Borçalıdan ona masaj etməsini istəyib. Telli yerə uzanan Əkbərin quluncunu sındırıb.
"Xəzər" televiziyasında yayımlanan "İncə səhər" verilişində adət halını almış "qucaq" şousunu bu siyahıya daxil etmək olar. Proqramda qonaq olan ağırlıqqaldırma üzrə Azərbaycan çempionu Fazilə İmanova musiqiçilərdən birini qucağına götürərək studiyada dövrə vurub. Video izləyicilər tərəfindən birmənalı qarşılanmayıb. Belə ki, videoya görə idmançı və teleaparıcı sərt şəkildə tənqid olunublar.
Yaxın zamanda Şou-biznesin məşhur cütlüyü Musa Musayev və Təranə Qumral efirdə etdikləri hərəkətə görə gündəm olmuşdu. Efirdə Təranə əri Musadan küsdüyü və onunla barışmayacağını deyib. Bu anda Musa Təranənin onu əvf etməsi üçün xanımını qucaqlayaraq, üzündən öpüb. Daha sonra qarşısında diz çökərək, əlindən də öpüb. Lakin Təranə "Mən Musanı qucaqlaya bilmərəm" deyərək onu bağışlamadığına işarə edib. Bunu eşidən Musa Təranəni qucağına alıb. Onun bu hərəkəti isə studiyadakı digər qonaqları məəttəl qoyub.

Bu yaxınlarda Əməkdar artist Mətanət İsgəndərli canlı efirdə aparıcının qucağına çıxıb. "Xeyirli axşamlar" verilişinin aparıcısı Anar gözlənilmədən bu hərəkəti edib. O, mədəkiçiltmə əməliyyatı etdirərək xeyli arıqlayan sənətçinin "çəkisizliyini" sübut etməyə çalışıb, müğənnini qucağına alaraq yuxarı qaldırıb. Görüntülər qısa zaman ərzində sosial şəbəkələrdə paylaşılaraq tənqid hədəfinə çevrilib.
Sonuncu dəfə "Elgizlə izlə" proqramında Xalq artisti Flora Kərimova ilə Əməkdar artist Elza Seyidcahan arasında gərgin anlar yaşanıb. Proqram zamanı mübahisə edən sənətçilərin davası Seyidcahanın mikrofonu söndürüldükdən sonra da davam edib. Sonda Seyidcahan mikrofonu yerə çırparaq efiri tərk edib.

Sevda Səfərova

Telegramda izləyin