TƏBİB-ə yeni səlahiyyət verildi! Hansı dəyişiklər gözlənilir? - RƏSMİ AÇIQLAMA

"Uşaq hüquqlarının həyata keçirilməsinə dair elektron məlumat bankının təşkili və aparılması Qaydası"nda dəyişiklik edilib. Bununla bağlı Baş nazir Əli Əsədov Qərar imzalayıb.

Qərara əsasən, elektron məlumat bankının istifadəçiləri Azərbaycan Respublikasının Ailə, Qadın və Uşaq Problemləri üzrə Dövlət Komitəsi, Azərbaycan Respublikasının Daxili İşlər Nazirliyi, Azərbaycan Respublikasının Ədliyyə Nazirliyi, Azərbaycan Respublikasının Elm və Təhsil Nazirliyi, Azərbaycan Respublikasının Səhiyyə Nazirliyi, Azərbaycan Respublikasının Əmək və Əhalinin Sosial Müdafiəsi Nazirliyi, Azərbaycan Respublikasının Gənclər və İdman Nazirliyi, Azərbaycan Respublikasının Dövlət Miqrasiya Xidməti, Tibbi Ərazi Bölmələrini İdarəetmə Birliyi (TƏBİB), yetkinlik yaşına çatmayanların işləri və hüquqlarının müdafiəsi üzrə komissiyalar, yerli icra hakimiyyətinin qəyyumluq və himayə orqanlarıdır.

Məsələ ilə bağlı TƏBİB-dən Sonxeber.az-a məlumat verilib:

"Qeyd edirik ki, həmin Qaydanın müvafiq bəndlərində "uşağın qeydiyyatda olduğu dövlət tibb müəssisəsi" anlayışı qeyd edilmişdir. Dövlət tibb müəssisələrinin TƏBİB-in tabeliyində fəaliyyət göstərməsini nəzərə alaraq Qaydaya əsasən tələb olunan məlumatların daha operativ və çevik şəkildə elektron məlumat bankına daxil edilməsini təmin etmək üçün İcbari Tibbi Sığorta üzrə Dövlət Agentliyinə verilmiş öhdəliklər yeni dəyişikliyə əsasən TƏBİB-ə həvalə edilmişdir".

Qeyd edək ki, yeni dəyişikliklə İcbari Tibbi Sığorta üzrə Dövlət Agentliyi bu siyahıdan çıxarılıb, onu TƏBİB əvəz edib.

Sevda Səfərova

Telegramda izləyin