"Elə ailələr var ki, onlar özləri, cəmiyyət və gələcək üçün böyük təhlükə böyüdürlər" - DEPUTAT

Xəbər verdiyimiz kimi, dünən Bakıda 1999-cu il təvəllüdlü Əhməd Əhmədov öz ailəsinin 5 üzvünü xüsusi amansızlıqla qətlə yetirib. Ailəsinin 5 üzvünü xüsusi amansızlıqla qətlə yetirən Əhməd Əhmədov barəsində 4 ay müddətinə həbs qətimkan tədbiri seçilib.

Bunu Sonxeber.az-a danışan deputat Müşfiq Cəfərov bildirib ki, fevralın 13-ü bütün ölkəni sarsıdan cinayət hadisəsi baş verdi. Həqiqətən insan inanmaq istəmir ki, bu ölkədə belə bir hadisə olub:

"Əslində belə bir halda konkret kimisə günahlandırmaq tək çıxış yolu deyil. Mən sosial platformalarda müxtəlif yanaşmalar görürəm, kimisi ata- ananı, kimisi onu xəstəxanadan çıxışına icazə verən həkimi günahkar bilir. Tam səmimi deyirəm ki, bu tip problemlə qarşılaşan bir çox ailə elə həmin ailənin etdiyi səhvi təkrarlayır. Hazırda həmin potensialda bəlkə də yüzlərlə uşaq böyüyür və ailə bu aqresiyanın səbəbini tam dərindən bilmir, həmçinin həkimlərin də məsləhətinə qulaq asmır. Həll yolunu isə uşağın dediklərini yerinə yetirməkdə və ya dərmanlarla sakitləşdirməkdə görür. Təbii ki bu qədər aqressiya bir günə, bir ilə yaranmayıb. Hələ ki, yeniyetmə zamanında bu vətəndaş ailəsinə kifayət qədər xəstəliyinin ağırlığını nümayiş etdirib. Düşünürəm ki, bu tipdə olan uşaqların həkim nəzarətində müalicəsini təmin etmək üçün təkcə məktəbin qərarı və rəyi kifayət etməyəcəkdir. Mütləq şəkildə ailələr övladlarının xəstəliyinə həssas yanaşmalıdır. Digər tərəfdən də cinayəti törədənin həqiqətən də xəstə olduğu şübhə altındadır. Mediada yayılan videolardan da görünür ki, həmin şəxs sərbəst şəkildə jurnalistlərin sualını cavablandırır. Lakin bütün hallarda bu şəxsin potensial təhlükə olduğu bəllidir. Bütün ailələrə demək istəyirəm ki, uşaqların problemlərini gizlətmək, başqa yollarla həll etmək əvəzinə müalicə üçün həkimə müraciət etsinlər. Hazırda bəlkə də elə ailələr var ki, onlar həm özləri, həm də cəmiyyət üçün gələcək üçün böyük təhlükə böyüdürlər".

Telegramda izləyin