Polislərin əməkhaqqı artırıla bilər - Deputatdan TƏKLİF

Bu gün təklif olunan məsələlərdən biri də polislərin maaşının artırılmasıdır. Növbəti mərhələdə polislərin maaşı artırılacaqmı?

Bununla bağlı Sonxeber.az-a danışan deputat Cavanşir Paşazadə bildirib ki, polislərimizin maaşının artırılması məsələsi Milli Məclisdə deputat həmkarlarım tərəfindən bir neçə dəfə qaldırılıb:

"Bu gün qorxmadan, təhlükəsiz şəkildə yaşamağımızı polislərimizə borcluyuq. Polislər 24 saat xalqımıza xidmət edir. Onlar bizim təhlükəsizliyimiz üçün hətta həyatlarını belə riskə atırlar. Hər hansı bir binada, ticarət mərkəzində yanğın baş verəndə, avtomobil qəzasında və ya digər hadisələrdə Azərbaycan polisinin canını necə heçə sayaraq insanları xilas etməklərinin şahidi olmuşuq. Eləcə də koronavirus pandemiyası ilə mübarizədə və 44 günlük Vətən müharibəsində Azərbaycan polisi əsl vətəndaşlıq mövqeyini ortaya qoydu. Bilirsiniz ki, 44 günlük Vətən müharibəsində Daxili İşlər Nazirliyinin 66 əməkdaşı şəhid olub. Əgər Daxili İşlər Nazirliyinin hərbi qulluqçuları cəbhədə düşmənə qarşı döyüşürdüsə, polis əməkdaşları da eyni anda ikinci bir düşmənlə mübarizə aparırdı.Həmin dövrdə bizim gözə görünməyən ikinci düşmənimiz COVID-19 virusu idi. Gözlə görünməyən bu düşmənlə mübarizədə polislərimiz üzüağ çıxdılar".

Deputat vurğulayıb ki, Daxili İşlər Nazirliyinin əməkdaşları bütün şəhər və kəndlərimizdə, o cümlədən işğaldan azad edilən ərazilərdə təhlükəsizliyin təmin olunmasında mühüm rol oynamaqdadır:

"Bu gün polis və hərbi qulluqçular işğaldan azad edilmiş ərazilərdə öz xidmətlərini yüksək səviyyədə həyata keçirərək dövlətimizin təhlükəsizliyinin xidmətindədirlər. Soyuq, isti demədən cəsur polislərimiz daim Azərbaycan qanunlarının keşiyindədir. Məhz ona görə də düşünürəm ki, polislərin maaşı artırılmalıdır. Düşünürəm ki, polislərin maaşının artırılması ilə bağlı məsələyə baxıla bilər".

Telegramda izləyin