14-16 yaşlı qızlarını ərə verən valideynləri hansı CƏZA GÖZLƏYİR? - CAVAB

Son zamanlar ölkədə azyaşlı qızların evlilik halları artıb. Yetkinlik yaşına çatmamış şəxsləri evləndirilməsi zamanı həmin qızların valideynlərinə hansı cəza verilə bilər?

Məsələ ilə bağlı vəkil Elvin Əliyev Sonxeber.az-a açıqlama verib.

Vəkil 18 yaşdan aşağı şəxslərin evləndirilməsinin qanun qarşısındakı cəzalarını açıqlayıb:

"Azərbaycanda "Gender təminatları haqqında" 2006-cı ildə qanun qəbul edilib. Bundan əlavə, "Məişət zorakılığının qarşısının alınması haqqında" qanun 2010-cu ildə qəbul edilib. Nikaha məcburetmə özü məişət zorakılığının bir növüdür. Bunun 18 yaşına çatmış və ya 18 yaşdan yuxarı insanlara aid edilməsinin fərqi yoxdur.
18 yaşına (yetkinlik yaşına) çatmayan və tam fəaliyyət qabiliyyəti əldə etməyən şəxslər uşaq-yeniyetmə hesab olunur. Azərbaycan Respublikasında nikah yaşı 18 yaş müəyyən olunub. Üzrlü səbəblər olduqda, nikaha daxil olmaq istəyən və nikah yaşına çatmamış şəxslərin xahişi ilə onların yaşadığı ərazinin müvafiq İcra Hakimiyyəti orqanı nikah yaşının 1 ildən çox olmayaraq azaldılmasına icazə verə bilər.
Digər hallarda nikaha daxilolma erkən nikah hesab edilir və müvafiq qanunvericiliyə əsasən belə nikahlar etibarsız sayılır".

Vəkil bildirib ki, məsuliyyət yalnız qadını nikaha məcbur edən şəxs deyil, həmin qadının yaşından və hadisənin baş vermə mexanizmindən aslı olaraq onunla evlənən kişi də məsuliyyətə cəlb oluna bilər
"Azərbaycan Respublikası Cinayət Məcəlləsinin Maddə 176-1-ci maddəsinə əsasən qadını nikaha daxil olmağa məcbur etmə
176-1.1. Qadını nikaha daxil olmağa məcbur etmə -iki min manatdan üç min manatadək miqdarda cərimə və ya iki ilədək müddətə azadlıqdan məhrum etmə ilə cəzalandırılır.
176-1.2. Eyni əməllər nikah yaşına çatmayan şəxs barəsində törədildikdə -üç min manatdan dörd min manatadək miqdarda cərimə və ya dörd ilədək müddətə azadlıqdan məhrum etmə ilə cəzalandırılır.
18 yaş 1989-cu il tarixli Uşaq Hüquqları Konvensiyasında müəyyənləşmiş son həddir, uşaqların nikaha daxil olması insan hüquqlarının pozulması hesab olunur.
Məsuliyyəti yalnız qadını nikaha məcbur edən şəxs deyil, həmin qadının yaşından və hadisənin baş vermə mexanizmindən aslı olaraq onunla evlənən kişi də məsuliyyətə cəlb oluna bilər.
Beləki Azərbaycan Respublikası Cinayət Məcəlləsinin Maddə 152-ci maddəsinə əsasən on altı yaşına çatmayan şəxslə cinsi əlaqədə olma və ya seksual xarakterli digər hərəkətlər etmə

152.1. On dörd yaşına çatmış, lakin on altı yaşına çatmayan şəxslə cinsi əlaqədə olma və ya seksual xarakterli digər hərəkətlər etmə -üç ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə və ya edilməməklə bir ildən üç ilədək müddətə azadlıqdan məhrum etmə ilə cəzalandırılır.
Həmçinin həmin qanunun 153- cü maddəsinə əsasən on altı yaşına çatmayan şəxsə qarşı əxlaqsız hərəkətlər
153.1. On altı yaşına çatmayan şəxsə qarşı zor tətbiq etmədən əxlaqsız hərəkətlər törətmə, habelə həmin şəxsi cinsi zorakılıq hərəkətləri və ya seksual fəaliyyəti müşahidə etməyə cəlb etmə — üç ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə və ya edilməməklə üç ilədək müddətə azadlıqdan məhrum etmə ilə cəzalandırılır.
153.2. Eyni əməllər on dörd yaşına çatmayan şəxs barəsində törədildikdə — üç ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə və ya edilməməklə iki ildən beş ilədək müddətə azadlıqdan məhrum etmə ilə cəzalandırılır.
153.3. Bu Məcəllənin 153.1 və ya 153.2-ci maddələrində göstərilən əməllər yetkinlik yaşına çatmayanı tərbiyə etmək vəzifəsi daşıyan şəxslər və ya yetkinlik yaşına çatmayana nəzarəti həyata keçirmək vəzifəsini daşıyan təhsil, tərbiyə, tibbi və ya digər müəssisənin müəllimi və ya digər işçisi tərəfindən törədildikdə — üç ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə və ya edilməməklə üç ildən altı ilədək müddətə azadlıqdan məhrum etmə ilə cəzalandırılır.
153.4. Bu Məcəllənin 153.2 və ya 153.3-cü maddələrində göstərilən əməllər
153.4.1. təkrar törədildikdə;
153.4.2. iki və ya daha çox şəxsə qarşı törədildikdə – üç ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə beş ildən doqquz ilədək müddətə azadlıqdan məhrum etmə ilə cəzalandırılır".

Telegramda izləyin