İcra hakimiyyətləri ləğv edilib bələdiyyələr ilə əvəzlənsin! - AÇIQLAMA

Xəbər verdiyimiz kimi, Azərbaycan Prezidenti İlham Əliyevin təqdimatında Milli Məclisə bələdiyyələrlə bağlı iki qanun layihəsi daxil olub. Bunu Milli Məclisin Regional məsələlər komitəsinin sədri Siyavuş Novruzov deyib. O, bildirib ki, bələdiyyələrin problemlərinin həlli ilə bağlı parlamentə iki qanun layihəsi daxil olub və artıq komitəyə təqdim olunub. Layihələrdə bələdiyyələrin sayının azaldılması, birləşməsi ilə bağlı məsələ yer alıb. Bəs hansı bələdiyyələr birləşdirilə bilər?

Məsələ ilə bağlı, politoloq Turan Rzayev Sonxeber.az-a açıqlamasında bildirib ki, bu mövzuda icra hakimiyyəti institutlarının taleyi sual altındadır:

" Burada bələdiyyə institutlarının, icra hakimiyyəti institutları ilə əvəzlənməsi, daha doğrusu bələdiyyə institutlarının artırılmasına daha da ehtiyac var. Ən yaxşı nümunə olaraq, qardaş Türkiyədəki variantı göstərmək olar. Ora böyük bələdiyyələr mövcuddur. Kiçik bələdiyyələrin hamısı böyük şəhər bələdiyyələrinə tabedirlər. Bələdiyyələrin özləri nəqliyyat, təhsil, səhiyyə məsələsində sərbəstlikləri var. Tam bir federallaşma olmasa da, unitar, federal, hibrid bir sistem kimi yaradıla bilər. Hesab edirəm ki, indiki məqamda rayonların tam olaraq ləğv edilməsinə ehtiyac yoxdur. Amma ümumrespublika səviyyəsində rayonlarımızın sayı çoxdur. Bu rayonların idarəetmələri böyük şəhər bələdiyyələri üzrə aparıla bilər. Bu həm kadr baxımından yeni iş yerlərinin açılmasına, həm də iqtisadi baxımında rayonların tabe olduqları şəhərlərin inkişaf etməsinə gətirib çıxara bilər. Prinsip etibarilə bu həm də Bakı və ətraf ərazilərə olan axının qarşısını alacaqdır. Bakının günü-gündən əhali sayının artmasına müəyyən mənada qarşısını alar. O ərazilər inkişaf edəcəyi təqdirdə insanlar orada qalıb işləyə bilər".

Qeyd edək ki, əhali sayı 3 mindən az olan kəndlərin bələdiyyəsi birləşdiriləcək. Böyük bələdiyyələr yaradılacaq. Bu da bələdiyyələrin sosial-iqtisadi vəziyyətini yaxşılaşdıracaq.

Sevda Səfərova

Telegramda izləyin