Azərbaycanda tələbə təqaüdləri 345 manata qədər artırılmalıdır! - AÇIQLAMA

Məlum olduğu kimi, tələbələrin təqaüdlərinin artırılması ölkədə aktuallığını qoruyub saxlayır. Sonuncu dəfə tələbə təqaüdlərinin artımı ölkə prezidentinin sərəncamı ilə 2023-cü il yanvarın 1-dən artırılıb. Lakin verilən təqaüd məbləğləri tələbələrin ehtiyaclarını qarşılamır. Çünki tələblər təhsil haqları, kirayə pulu yol xərcləri daxil olmaqla ehtiyaclarını qarşılayır və bunun üçün işləmək məcburiyyətində qalırlar. Bu da özlüyündə onların dərslərinə olan davamiyyətinə mənfi təsir göstərir. Bəs Azərbaycanda tələbələrin təqaüdləri 345 manata qədər qaldırıla bilər?

Mövzu ilə bağlı təhsil məsələləri üzrə ekspert Kamran Əsədov Sonxeber.az-a açıqlama verib. Onun sözlərinə görə, Azərbaycanın 51 ali təhsil müəssisəsində 187 min tələbə təhsil alır. Onun 110 minə qədəri ödənişli əsaslarla oxuyur. Azərbaycanda ali təhsil müəssisələrinə bakalavr və magistratura, doktorantura, o cümlədən subbakalavr və eyni zamanda peşə təhsilində təhsil alanlar müxtəlif məbləğlərdə təhsil alırlar:

" Hal- hazırda fəlsəfə doktoru hazırlığında doktorantlara 240 manat, elmlər doktoruna 400 manat təqaüdlər verilir. Eyni zamanda magistraturada əlaçı olanlara 195 manat, zərbəçilərə 160 və adi göstəricilərə 110 manat verirlər. Bakalavara maksimum 175 manat, adilər 100 manatdır. Ölkədə hal-hazırda kommunal xidmətlərin yüksəkliyini, qida ehtiyacının kifayət qədər çoxaldığını nəzərə alsaq ciddi şəkildə biz vəsaitin azlığını müşahidə edirik. Azərbaycanın ali təhsil müəssisələrində təhsil alan bakalavrların təqaüdləri çox aşağıdır. Bu günləri əlaçı 175 manat, zərbəçi isə 145 manatdır. Kifayət qədər az bir məbləğdir. Nəzərə alsaq ki, Azərbaycanda minimum yaşayış həddi var və bu şəxslərin yaşı 18-dən çoxdur. Başqa yerlərdə demək olar ki, çalışmırlar. Hesab edirəm ki, onların təhsil haqlarının artmasına ehtiyac var".

Ekspert bildirib ki, bu gün Azərbaycanda minimum əməkhaqqı 345 manatdır və minimum ehtiyaclar var:

"Düşünürəm ki, istər bakalavrlar, istərsə də subbakalavrlar və peşə təhsilində təhsil haqları daha aşağıdır. Elmlər doktoru hazırlığında 400 manat kifayət qədər az bir məbləğdir. Çünki onlar iş yerlərindən ayrılmaqla doktorantura oxuyurlar. Bu doğru deyil. Düşünürəm ki, doktorantura təqaüdləri azı min manatın üzərində olmalıdır. Magistrların təqaüdü 400 manatdan yuxarı olmalıdır. Bakalavriat pilləsində təhsil alanların təqaüdləri isə 300 manatdan çox olmalıdır. Çünki onlar kirayə haqqı daxil olmaqla yol xərclərini ödəyirlər. Onların həqiqətən xərcləri çoxdur. Bu onların vəsait itirməsinə gətirib çıxara bilir. Mən düşünürəm ki, tələbələrin təqaüdləri artmalıdır. Azərbaycanın kifayət qədər iqtisadi gücü var. Bizim həmin tələbələrə yaxşı təqaüd vermək imkanımız var. Birmənalı şəkildə tələbələrin təqaüdləri minimum ehtiyac səviyyəsində artırılmalıdır".

Sevda Səfərova

Telegramda izləyin