"Xudafərindəki görüş Azərbaycan-İran münasibətlərinin daha da yüksək səviyyələrə çatdırılmasına kömək edəcək" - DEPUTAT

Xəbər verdiyimiz kimi Novruz bayramına qədər Azərbaycan və İran prezidentlərinin Xudafərində görüşü olacaq.

Görüş barədə Sonxeber.az-a danışan deputat Aydın Mirzəzadə bildirib ki, Azərbaycan və İran qonşu dövlətlərdir:

"Bizim qonşuluq münasibətimizə hər hansı alternativ yoxdur. Azərbaycan hər zaman İranla yaxşı münasibətin tərəfində olub. Bunun üçün lazım olan bütün addımlar atıb. Ötən ilin fevralında Tehrandakı səfirliyimizə edilən silahlı basqın münasibətlərimizdə müəyyən soyuqluq yaratmışdı. Azərbaycan İran hökumətindən səfirliyimizə silahlı basqın edənlərin ciddi cəzalandırılmasını və təhlükəsizliyin sistemli şəkildə təmin olunması istəmişdi. Son dövrlər bu istiqamətdə atılan addımlar münasibətlərimizin əvvəlki vəziyyətinə qayıtmasına kömək etdi. İranın rəsmi şəxsləri vaxtaşırı ölkəmizə səfərlər edirlər. Səfərlər zamanı iki ölkə arasındakı əməkdaşlığın yüksək səviyyə çatdırılmasının yollar müzakirə edilir. Azərbaycan və İran prezidentlərinin Xudafərində görüşü də bu istiqamətdə atılan ciddi addımdır. İlk dəfədir ki, iki ölkə rəhbərləri paytaxtda deyil, sərhəddə görüşürlər. Xudafərin Azərbaycan üçün tarixi şərəf yeridir. Bu görüşün Xudafərində olması Azərbaycanın öz ərazi bütövlüyünün təmin edilməsinin göstəricisidir. İran rəhbərliyinin orada görüşə razılıq verməsi Azərbaycanla olan münasibətlərin onun üçün önəmli olmasının göstəricisidir. Bu görüş əməkdaşlığımızın daha da yüksək səviyyələrə çatdırılmasında və mehriban qonşuluq münasibətləri daim hər iki ölkənin diqqətində olmasına kömək edəcək. Azərbaycan tərəfində bu məsələdə heç bir problem yoxdur".

Telegramda izləyin