Dövlət qulluqçuların təkrar imtahan verməsi LƏĞV OLUNUR - VACİB AÇIQLAMA

Dövlət qulluğuna qəbul olmaq istəyən şəxslər ilk olaraq müvafiq bilik və bacarıqları yoxlanılmaqla imtahanlara cəlb olunurlar. "Təlim və inkişaf sistemində müasir çağırışlar" mövzusunda forum zamanı DİM-in Direktorlar Şurasının sədri Məleykə Abbaszadə dövlət qulluğu imtahanlarında dəyişikliklə bağlı verdiyi açıqlama ilə diqqət çəkib. Onun sözlərinə görə, dövlət qulluğunda səriştə modelinə keçid bir il ərzində təmin olunacaq.

Dövlət qulluğu ilə bağlı son illərdə müsbət istiqamətdə irəliləyişlər var. Amma dövlət qulluqçuları iş yerlərini dəyişərkən təkrar imtahan vermək məcburiyyətində qalır. Onsuz da bu şəxslərin müvafiq bilik və bacarıqları ilkin imtahan nəticəsində yoxlanılır. Belə olan halda dövlət qulluqçuların təkrar imtahan verməyi ləğv oluna bilər.

Mövzu ilə bağlı Sonxeber.az-a danışan təhsil məsələləri üzrə ekspert Kamran Əsədov deyib ki, 2016-cı ildən bəri dövlət qulluğuna qəbul imtahanlarında ciddi və müsbət dəyişiklik müşahidə edilir. İmtahanın test, o cümlədən müsahibə mərhələsi obyektiv, şəffaf və əlçatandır:

"Hal-hazırkı imtahanlar bu sahədə müəyyən bilik və bacarıqlara malik olanlar üçün kifayət qədər işə qəbulda kömək edir. İndiyə qədər ali məktəblərdən yetəri qədəri imtahan yolu ilə işə qəbul olublar. İşə qəbul prosesində iştirakçının müxtəlif bilik və bacarıqları yoxlanılır. Kompüter bacarıqları, qanunvericilik biliyi və digər məsələlər bir işə qəbul ilə yoxlanılır. Düşünürəm ki, onlar iş yerini dəyişəndə yaxud yuxarı vəzifəyə təyinat alanda onların təkrar imtahan verməsinə ehtiyacı yoxdur. Bu bacarıqlar onlarda bir dəfə yoxlanılıb".

Ekspertin sözlərinə görə, beş ildən bir dövlət qulluqçularının sertifikasiyaya cəlb edilməsinə ehtiyac var. Bu da onların peşə uyğunluğunun yoxlanılıb və ölçülməsinə görə vacibdir:

"Yoxsa mütəmadi olaraq həmin şəxsləri müxtəlif imtahanlara daxil etsək bu onların işlərini kənara qoyub, daha çox imtahana hazırlaşmağına gətirib çıxara bilir. Təkrar imtahanlar yaxud onların hər hansı bir peşə fəaliyyətindən asılı olaraq onlara kömək etməyəcək məsələlərə cəlb etmək işçilərin peşəkarlığını aşağı salır. Hesab edirəm ki, yalnız sertifikasiya uyğunluğunu yoxlayan imtahanlara ehtiyac var. Şəxslərin təkrar imtahanlara daxil edilməsi onların iş yerini poza bilər. Vətəndaşlar yeni işə qəbul olanda daha çox diqqətlərini, öz peşəkar bacarıqlarını həmin sahə üzrə artırmağa çalışırlar. Biz şərti olaraq çalışan bir şəxsi digər qanunvericiliklərlə imtahanlar ilə yoxlasaq o diqqətini başqa sahəyə yönəldəcək. Bu da keyfiyyətin aşağı düşməsi deməkdir. Hesab edirəm ki, təkrar imtahanlar və yaxud peşə sahəsində aid olmayan imtahanlar ləğv olunmalıdır. Bu dövlət qulluqçusunun peşəkarlığını artırmaq üçün çox yaxşı olardı".

Sevda Səfərova

Telegramda izləyin