"Konserlərdən qazandıqlarımla ayda bir maşın ala bilərdim"

"Heç vaxt deməyiblər ki, "sizin səsiniz var və siz oxumalısınız". Səsim yox idi. Bəlkə də indi də səsim yoxdur. Bilmirəm... Amma başladım oxumağa. Daha sonra təhsilimi müğənni kimi estrada şöbəsində almağa davam etdim. İlk dəfə SSRİ də estrada şöbəsi açdılar və məni 3-cü kursa qəbul etdilər. Çünki artıq mənim bu yöndə təhsilim var idi, musiqiçi idim. Daha sonra məni Moskvanın Filarmoniyasına dəvət etdilər və ilk addımlarım oradan başladı".

Axşam.az xəbər verir ki, bu sözləri Xalq artisti Sərxan Sərxan qonaq olduğu "Yaşananlar" verilişində deyib. 72 yaşlı müğənni qazancından danışıb:

"Heç zaman pulun arxasıyca qaçmamışam. Qazancım konsertlərdən gəlib. Mənim ən aşağı qazancım sovet dövründəki pulla 5 manat olub. Sonra qazancım bir konsert üçün 112 manat oldu. Mən bir ayda 40-60 konsert verirdim. Verdiyim bu konsertlərin pulu ilə ayda bir avtomobil ala bilərdim. Amma özümü varlı saymırdım. Bəzən isə utanırdım ki, o qədər çox pul alıram. Çünki o zamanlar insanlar bir ay işləyib 120 manat pul alırdı. Mən isə bir ayda 3000-4000 manat pul alırdım. Utanırdım".

S.Sərxan hazırda olan toylardan da söz açıb:

"Toy müğənnisi deyiləm. Arada olur ki, hansısa dostumun məclisinə gedirəm. Onlar məndən xahiş edirlər ki, 3-4 mahnı ifa edim, çıxıb oxuyuram. Özü də o məclislərdə qonaqların da səviyyəsi başqa cür olur. Ona görə... Amma belə toylara getmək və orada çıxış etmək, xeyr. Mən öz repertuarımla toya lazım olan müğənni deyiləm".

Telegramda izləyin