Universitetlərin qapıları geniş, çıxış isə DAR OLMALIDIR - AÇIQLAMA

Xəbər verdiyimiz kimi, bu il Azərbaycan təhsil tarixində ən yüksək göstərici qeydə alınıb. 55656 nəfər (o cümlədən 7287 subbakalavr) ali təhsil müəssisələrinə qəbul olunub.

Bu gün Azərbaycanda ali təhsilə qəbul olmaq əlçatandır. Əlbəttə ki, təhsil almaq hər bir abituriyentin haqqıdır. Sağlam gələcəyin formalaşmasının yolu savadlı gənclərimizdən keçir. İldən-ilə keçid ballarının aşağı düşməsi ilə bağlı fikirlər səsləndirir. Vətəndaşlar arasında belə bir fikir yaranıb ki, keçid balları artırılmalı ya da fərqli bir sistem formalaşmalıdır. Bu fikir nə dərəcədə doğrudur? Ali təhsil müəssisələrinə qəbul prosesində dəyişikliyə ehtiyac var?

Mövzu ilə bağlı Sonxeber.az-a danışan təhsil məsələləri üzrə ekspert İlqar Orucov deyib ki, bu il ali təhsil müəssisələrinə qəbul prosesi say baxımından ən yüksək göstəricidir. ONun sözlərinə görə, plan yerlərinin və universitetlərin sayında son illər artım müşahidə olunur:

"Mən həqiqətən o fikirdəyəm ki, bizim gələcəyimiz üçün gənclərin təhsil almaq imkanlarını genişləndirmək lazımdır. Eyni zamanda 56656 nəfər Azərbaycan universitetlərinə qəbul alıblar. Azərbaycan gənclərinin təhsil alması üzrə dövlət proqramı, eyni zamanda dövlətlərarası mübadilə proqramı çərçivəsində gənclərimiz təhsillərini xaricdə davam etdirirlər. Mən gənclərimiz üçün bu qədər imkanların genişlənməsinin tərəfdarıyam. Ali təhsil almaq imkanları genişlənməlidir".
Ekspert bildirib ki, on minlərlə gəncimiz hər il bir çox ölkələrə təhsil almağa gedirlər. Bu kateqoriyadan olanlar isə əsasən aşağı bal toplayan abituriyentlərimizdir:

"Bu növbəti illərdə gənclərimiz üçün müəyyən problemlər yaradır. Onlar bir çox hallarda xaricdə təhsil imkanları vəd edən şirkətlərin qurbanlarına çevrilirlər. Bütün hallarda təhsil almaq imkanlarının genişləndirilməsi çox vacibdir. Əlçatanlıq tək plan yerlərinin artırılması ilə bağlı deyil. Əlçatanlıq həm Maddi baxımından sıxıntılı olan ailələrin təhsil haqlarına dəstək olmaqdır. Bununla əlaqdər Təhsil Tələbə Kredit Fondu yaradılıb. Yaxşı oxuyan tələbələrin təhsilləri ilə bağlı dövlət motivasiya edici işlər görür. Hətta tələbə ödənişli əsaslarla təhsil alırsa belə, təhsil göstəricilərinə uyğun olaraq təqaüd ala bilir. Təhsil balları demək olar ki, hər il aşağı düşür. Bir məsələni nəzərə almaq lazımdır. Universitetlərə qəbul asanlaşmalı, universiteti bitirmək isə çətin olmalıdır. Bizim universitetlərə qəbul olan əksər tələbələr məzun ola bilirlər. Bu düşündürücüdür. Onlar həqiqətənmi universitetlərdə lazım olan bilikləri alırlar? Yəni mütəxəssis kimi onlara lazım olacaq biliklər verilirmi? Bu suallar haqqında ətraflı fikirləşmək lazımdır".

İlqar Orucov vurğulayıb ki, universitetlərin qapıları geniş, çıxış qapıları isə daha dar olmalıdır:

"Bu fəlsəfə ilə çıxış etsək daha doğru yanaşmanı tətbiq etmiş olacağıq. Universitet bir mədəni intellektual mühitdir. Burada yalnız ixtisas bilikləri aşılanmır. İxtisas bilikləri ilə bərabər sosiallaşırlar. Tələbələrin şəxsiyyət kimi formalaşmasında universitet müstəsna rol oynayır. Bu baxımdan universitet həyatını keçmək gənclər üçün çox önəmlidir. Fikirləşirəm ki, son göstəricilərdən sonra plan yerlərinin artırılmasına ehtiyac var. Bəzən aşağı bal ilə universitetə qəbul olmuş bir gənc sonradan uğurlu bir mütəxəssis kimi formalaşır. Onlarda məsuliyyət və disiplin anlayışi formalaşır. Ona görə də universitetlərə qəbul faydalıdır".

Qeyd edək ki, ali təhsil müəssisələrinin müsabiqəsində 82883 nəfər iştirak edib. Onlardan 55656 nəfəri (o cümlədən 7287 subbakalavr) ali təhsil müəssisələrinə qəbul olunub. 27117 (o cümlədən 1579 subbakalavr) nəfər dövlət sifarişi əsasında, 28539 (o cümlədən 5708 subbakalavr) nəfər isə ödənişli əsaslarla təhsil almaq hüququ əldə edib.

Sevda Səfərova

Telegramda izləyin