Keçmiş sevgilisinin maşınını əzib qaçdı

Sultangazidə keçmiş sevgilisinin avtomobilini əzən şəxs hadisə yerindən qaçıb.

Sonxeber.az türk mediasına istinadən xəbər verir ki, hadisə dünən saat 23.30 radələrində İsmetpaşa məhəlləsində baş verib. İddiaya görə, şübhəli şəxs keçmiş sevgilisini maşını ilə evə gedərkən izləməyə başlayıb. Təqib olunduğunu anlayan gənc qadın küçələrə girərək gizlənməyə çalışıb.

Lakin qarşısındakı avtomobil küçədə dayananda gənc qadın maşını saxlamalı olub. Onu izləyən keçmiş sevgilisi öz maşını ilə qadının avtomobilini arxadan vurub. Qısa müddət sonra avtomobildən düşən şəxs əvvəlcə keçmiş sevgilisinin avtomobilinin ön sol qapısını sındırmağa çalışıb, daha sonra qadına hücum edib.

Bununla da kifayətlənməyən təcavüzkar dirsəyi ilə avtomobilin arxa şüşəsini vuraraq sındırıb. Şübhəli şəxs yenidən maşınına minərək gənc qadının maşınını əzib. Gənc qadın qışqıraraq məhəllə sakinlərindən kömək istəyib. İnsanların reaksiyasından sonra şübhəli maşını ilə hadisə yerindən qaçıb. Məlumat verildikdən sonra hadisə yerinə təcili tibbi yardım və polis sövq edilib. Gənc qadın təcili tibbi yardımla xəstəxanaya aparılıb.

Polis hadisə ilə bağlı istintaq başladıb. Qaçan şübhəlinin axtarışları davam edir.

Telegramda izləyin