Zərdabda 15 yaşlı qızın ölümünün TƏFƏRRÜATLARI

"Zərdab Rayon Mərkəzi Xəstəxanasında əməliyyatdan sonra dünyasını dəyişən xəstənin hemodinamik göstəriciləri norma daxilində olub".

Sonxeber.az xəbər verir ki, bu məlumat Oxu.az-ın sorğusuna cavab olaraq Tibbi Ərazi Bölmələrini İdarəetmə Birliyindən (TƏBİB) verilib.

Bildirilib ki, 4 sentyabr 2024-cü il tarixində saat 17:00-da 2005-ci il təvəllüdlü şəxs (qadın cinsli) Zərdab Rayon Mərkəzi Xəstəxanasına müraciət edib.

"Diaqnostik və laborator müayinələr aparıldıqdan sonra xəstəyə laparoskopik appendektomiya əməliyyatı icra olunub. Daha sonra xəstə qənaətbəxş vəziyyətdə cərrahiyyə şöbəsinə köçürülüb. Bu zaman onun hemodinamik göstəriciləri norma daxilində olub.

Saat 07:00-da xəstənin vəziyyəti anidən ağırlaşdığından dərhal Reanimasiya şöbəsinə yerləşdirilib. Aparılan reanimasiya tədbirlərə və həkimlərin səylərinə baxmayaraq, onun həyatını xilas etmək mümkün olmayıb", - deyə qurumdan bildirilib.

***14:24

Zərdab Rayon Mərkəzi Xəstəxanasında qızın əməliyyatdan sonra dünyasını dəyişməsi ilə bağlı bəzi detallar məlum olub.

Sonxeber.az xəbər verir ki, Oxu.az-ın əldə etdiyi məlumata görə, Aytən Ramil qızı Qarayeva korbağırsaqdan əməliyyat edilib.

"Gecə sancısı tutub, əməliyyata qaldırılıb. Əvvəl hər şey yaxşı olub, narkozdan ayılıb. Sonra qəfildən halı pisləşib və dünyasını dəyişib", - deyə məlumatda bildirilir.

Qeyd edək ki, baş vermiş hadisə ilə bağlı Tibbi Ərazi Bölmələrini İdarəetmə Birliyinə (TƏBİB) sorğu ünvanlanıb.

***12:46

Zərdabda 15 yaşlı qız vəfat edib.

Sonxeber.az xəbər verir ki, Modern.az-ın əldə etdiyi məlumata görə, hadisə Zərdab Rayon Mərkəzi Xəstəxanasında baş verib.

Rayonun Qoruqbağı kənd sakininin ötən gün keçirdiyi əməliyyatdan sonra dünyasını dəyişdiyi bildirilir.

Telegramda izləyin