Meymun çiçəyinin yayıldığı ölkələrə gediş-gəliş QADAĞAN OLUNA BİLƏR - AÇIQLAMA

Bu gün dünyada koronavirus pandemiyası bitməmiş meymun çiçəyi virusu yayılır. Avropa və Afrika ölkələrində yoluxma halları meymun çiçəyi xəstəliyinə yoluxma halları mövcuddur. Ötən həftə Türkiyədə meymun çiçəyi xəstələyinə ilk yoluxma faktının qeydə alındığı bildirildi və məsələ ilə bağlı araşdırmalara başlanıldı. Sonradan yayılan iddialar Türkiyə Səhiyyə Nazirliyi tərəfindən təkzib edildi.

Azərbaycan ərazisində bugünkü tarixədək meymun çiçəyi xəstəliyi ilə bağlı hallar qeydə alınmayıb. Lakuin bu virusdan heç kim sığortalanmayıb. Tədbir görülmədiyi halda virus pandemiyaya çevrilə bilər. Respublika ərazisində, xüsusi ilə sərhəd keçid məntəqələrində meymunçiçəyinə şübhəli hallar üzərində epidemioloji nəzarət gücləndirilib. Amma xarici ölkələrdən gələn turistlər bu xəstəliyə yoluxa bilər və ətrafdakı insanları xəstələndirə bilər. Meymun çiçəyi nadir bir virusdur. Xəstəliyə yoluxanlar 21 gün məcburi karantində qalırlar. Belə olan təqdirdə meymun çiçəyinin yayıldığı ölkələrə gediş-gəliş qadağan oluna bilər?

Mövzu ilə bağlı turizm məsələləri üzrə ekspert Ceyhun Aşurov Sonxeber.az- a açıqlamasında bildirib ki, hal-hazırda dünya mətbuatın meymun çiçəyi xəstəliyi ilə bağlı xəbərlər yayılır. Bunun da təhlükəli virus olacağı hesab edilir:
" Bu virus düzgün müalicə edilməsə insanın həyatı bahasına başa gələ bilər. Həmin xəbərlər turizm sahəsi üçün heç də yaxşı hesab olunmur. Amma dünya bu təcrübəni daha əvvəl yaşayıb. Mən düşünürəm ki, ölkələr daha tədbirli və təcrübəli davranırlar. Bu vəziyyət genişlənməmiş lazımi tədbirlər görüləcək. Ümid edirik ki, meymun çiçəyi xəstəliyi geniş yayılmayacaq və dünyada gedən bir çox proseslərə mənfi təsir etməyəcək".

Ekspertin sözlərinə görə, turizm sahəsi iqtisadiyyatın həssas bir qoludur. İnsanlar özünü təhlükəli altında hiss edən zaman səyahətlərini ləğv edirlər və özlərini izolyasiya etməyə çalışırlar:

"Xəstəlik geniş vüsət alarsa, müxtəlif məhdudiyyətlərin tətbiq edilməsi qaçınılmazdır və bu istiqamətdə addımlar atıla bilər. Ümid edirik ki, hər şey nəzarət altındadır. Meymun çiçəyi virusu geniş yayılmamış ölkələr mümkün qədər üzərinə düşən öhdəlikləri yerinə yetirməlidir. Əks təqdirdə keçmiş baş verən hadisələr və qoyulan məhdudiyyətlər yenidən yaşana bilər. Bu isə turizm üçün ciddi risk deməkdir".

Onkoloq-həkim, tibb elmləri doktoru, professor və səhiyyə eksperti Adil Qeybulla isə bildirib ki, yoluxucu infeksiyalar bu gün hansısa ölkədə qeyd alınıbsa, həmin xəstəlik istənilən ölkədə yayıla bilər:
" Xüsusilə meymun çiçəyi virusunun gizli dövrü təxminən 3 həftəyə yaxındır. İnfeksiyaya yoluxmuş şəxs sağlam vəziyyətdə bir ölkəyə gedə bilər və xəstəliyi yaya bilər. Bu virusdan heç bir sığortalanmayıb. Sadəcə olaraq əhali arasında maarifləndirmə tədbirlərini artırmaq və sərhədlərdə nəzarəti gücləndirmək əsas işdir. Bu xəstəliyə yoluxanlar və onların əlaqədə olan şəxslər dərhal nəzarətə götürülməli, dərhal karantin elan edilməlidir. Xəstəliklə mübarizə üsulu bundan ibarətdir. Mən düşünmürəm ki, meymun çiçəyi virusu geniş bir pandemiyaya səbəb olacaq. Hazırda bu real görünmür. Ancaq xırda epidemik ocaqlar ola bilər. Bunun da qarşısı alınmalıdır".

Sevda Səfərova

Telegramda izləyin