Tələbələrə təcrübə zamanı maaş VERİLƏ BİLƏRMİ? - ARAŞDIRMA

Ali təhsil müəssisələrində tələbələr 4-cü kursun sonlarında istehsalat təcrübəsinə göndərilirlər. Tələbələr maddi baxımından həssas qrupa aiddir. İstehsalat təcrübəsinin müddəti 3-4 ay olsa da tələbələr bu zaman maddi problemlər ilə üzləşirlər. Son dövrlər təcrübəçi axtaran şirkətlərin sayında artım müşahidə olunur. Onlar işçiləri, xüsusilə də, tələbələri öz şirkətlərinə cəlb edib onların əməklərindən istifadə edirlər. Bu zaman bir çox hallarda təcrübəçiyə ödəniş olunmur. Və ya 3-6 ay müddətində ödənişsiz işləməsini istəyirlər. Ümumiyyətlə tələbələrin sosial vəziyyətini yaxşılaşdırmaq məqsədilə təcrübə zamanı onlara qonorar verilə biləmi?

Mövzu ilə bağlı təhsil eksperti İlqar Orucov Sonxeber.az-a açıqlamasında bildirib ki, tələbələrə praktika dövründə hər hansı ödənişlərin edilməsi nəzərdə tutulmur:

"İstehsalat təcrübəsi tədrisin bir hissəsidir. Tələbə universitetdə oxuduğu zaman aldığı nəzəri bilikləri təcrübə dönəmində tətbiq edir. Ona görə də tələbələr üçün təcrübə dövründə qonorarların verilməsi nəzərdə tutulmayıb. Mən düşünürəm ki, tələbələrə sərbəstlik verməliyib. Təcrübəni universitet təşkil edir. Tələbənin ixtisasına uyğun olaraq müvafiq qurumlarla müqavilə imzalanır. Tələbənin təhlükəsizliyi təmin edilir. Bu ərəfədə təcrübə rəhbərinin tələbənin yanında olması mütləqdir. Burada müvafiq məbləğdə qonorarların verilməsi müzakirə olunmur".

Ekspertin sözlərinə görə, tələbə təcrübə keçdiyi qurumda qısa müddət ərzində fəaliyyət göstərir. Əmək münasibətləri əmək qanunvericiliyi ilə tənzimlənir:

"Tələbələr həssas qruplardır. Onların maddi vəziyyətini yaxşılaşdırmaq üçün belə bir məsələni müzakirə etmək olar. Amma belə bir təcrübənin olması yaxşı olardı. Bununla bağlı müvafiq araşdırmalara ehtiyac var. Hətta bir sıra xarici ölkələrin universitetlərində belə bir təcrübə yoxdur. Bizim universitetlərin istehsalat müəssisələri yoxdur. Azərbaycanda belə bir addım atılarsa, prosesləri daha rahat həyata keçirmək olar".

Maliyyə auditi Sonarə Vəliyeva söyləyib ki, təcrübəçilərə məcburi ödəniş məsələsi universitetin göndərdiyi və dövlət müəssisələrində olan təcrübəçilərə aiddir:

"Bu iki halda təcrübəçilərə ödəniş olunması məcburidir. Universitet ilə təcrübəyə göndərdiyi şəxs və müəssisə arasında üçlü müqavilə bağlanır. Orada təcrübəçilərə ödəniş olunması tələb olunur. Hətta belə bir şey də var ki, təcrübəçi istehsalatda baş verən bədbəxt hadisələrdən, əmək qabiliyyətinin itirilməsi hallarından məcburi tibbi sığorta olunmalıdır. Təcrübədə olduğu müddətdə də minimum aylıq əmək haqqı ilə təmin olunmalıdır".

Telegramda izləyin