"Ghost Rider" filmi reallığa çevrildi - VİDEO

Hindistanda avtomobilin alov topuna çevrilərək idarəetmədən çıxması magistral yolda panikaya səbəb olub. Kameraya düşən həmin anlar ağıIlara "Ghost Rider" filmini gətirdi.

Sonxeber.az xarici mediaya istinadən xəbər verir ki, Hindistanın Racastan əyalətinin Caypur şəhərində avtomobil hərəkətdə olarkən yanıb. Sürücü maşını yolun kənarında saxlayıb getsə də, alov topuna çevrilən nəqliyyat vasitəsi bir müddət sonra yanğını seyr edənlərə doğru irəliləməyə başlayıb. Yolda olan insanlar və sükanda olan digər şəxslər təşviş içində qaçıblar.

Yerli mətbuatın məlumatına görə, kondisionerdən gələn tüstüdən sonra sürücü avtomobilini kənara çəkərək kapotu açıb. Lakin avtomobilin mühərrikində başlayan yanğın sürətlə böyüyüb. Hadisə nəticəsində can itkisi və yaralanma olmasa da, hadisə yerinə gələn yanğınsöndürmə qrupu alovu nəzarətə götürüb.

Digər tərəfdən baş verənlər insanların yadına Hollivudun məşhur "Ghost Rider" filmini gətirdi. Sosial şəbəkə istifadəçiləri filmin reallığa çevrildiyini şərh ediblər.

Vüsalə İbrahimli

Telegramda izləyin