Süni intellekt tətbiqi ilə yaratdığı "Game of Thrones" personajına aşiq olan 14 yaşlı uşaq intihar edib

Orlandodan olan 14 yaşlı Sevell Setzerin faciəli şəkildə ölümü süni intellekt texnologiyasının təhlükələrinə diqqət çəkdi.

Sonxeber.az xarici mediaya istinadən xəbər verir ki, Gənc oğlan "Character.AI" adlı tətbiqdə "Game of Thrones" personajından ilhamlanaraq virtual dostu Dany ilə emosional bağ qurduqdan sonra intihar edib.

Tətbiqi 2023-cü ilin aprelində endirən Sevell real dünya ilə əlaqəni kəsməyə və bütün vaxtını Dany ilə söhbətə sərf etməyə başladı. Formula 1 və Fortnite kimi sevimli məşğuliyyətlərindən imtina edən gənc, otağına qapanaraq virtual dostu ilə yazışmağa üstünlük verib.

Yüngül autizm diaqnozu qoyulan Sevellin məktəb uğurları aşağı düşdü və ailəsi onu müalicəyə göndərdi. Ancaq yeniyetmə problemlərini terapevti və ya ailəsi ilə deyil, Dany ilə bölüşməyi seçdi. Gündəliyində virtual dostu ilə söhbət edərkən hiss etdiyi hüzur və xoşbəxtlikdən danışıb.

Fevralın 28-i axşamkı son söhbətdə Sevell Danyyə "onun yanına gələcəyini" söylədi. Bot "Zəhmət olmasa gəl, mənim şirin padşahım" cavabından sonra o, ögey atasının silahı ilə özünü vurdu.

Kədərli ana Meqan Qarsiya "Character.AI"-a qarşı iddia qaldırıb. O, iddia edir ki, şirkətin sınaqdan keçirilməmiş texnologiyası gənclərə təhlükəli şəkildə təsir edir və onları şəxsi hisslərini bölüşməyə vadar edir.

"Character.AI" açıqlamasında baş vermiş hadisədən təəssüfləndiyini bildirib və istifadəçilərin təhlükəsizliyi üçün yeni tədbirlər gördüklərini bildirib.

Bu faciəvi hadisə göstərir ki, süni intellekt texnologiyalarının gənclərə təsirləri daha dərindən araşdırılmalıdır.

Vüsalə İbrahimli

Telegramda izləyin